Սմարթֆոնների մատակարարումները նոր ռեկորդ են սահմանել

ԵՐԵՎԱՆ, 30 հոկտեմբերի. /ԱՌԿԱ/. Համաշխարհային շուկային մատակարարվող սմարթֆոնների ծավալը 2014 թվականի 3–րդ եռամսյակում նոր ռեկորդ է սահմանել` կազմելով 327.6 մլն սարք, հայտնում է IDC–ն։ Դա 8.7 տոկոսով շատ է 2014 թվականի երկրորդ եռամսյակի 301.3 միլիոնի դիմաց։ Նշենք, որ երկրորդ եռամսյակի արդյունքներով, շուկայի ծավալն առաջին անգամ գերազանցել է 300 միլիոնը (նախնական արդյունքների համաձայն` 295,3 մլն,), հաղորդում է Cnews.ru–ն։

2013 թվականի 3–րդ եռամսյակի համեմատ, 2014 թվականի 3–րդ եռամսյակում մատակարարումներն աճել են 25.2 տոկոսով։

«Չնայած շուկայի դանդաղման մասին ենթադրություններին` սմարթֆոնների մատակարարումները շարունակում են ռեկորդներ սահմանել»,– ասել է IDC–ի վերլուծաբան Ռայան Ռեյթը (Ryan Reith)։ Նա հայտնել է, որ աճի տեմպերը զարգացած պետություններում կազմում են 10 տոկոսից պակաս, մինչդեռ զարգացող տնտեսությամբ երկրներում` 30 տոկոս։

Ռեյթն ավելացրել է, որ իրենք սխալվել են` ենթադրելով, որ զարգացող տնտեսությամբ երկրներում գերակշռող դիրքում են շարունակում մնալ բջջային հեռախոսները։ Նա ասել է, որ արդյունքում սմարթֆոնները ճանաչում են ձեռք բերել այդ պետություններում` դրանց արժեքի նվազման շնորհիվ։

Վերլուծաբանը նշել է նաև, որ հետագայում արտադրողներին ավելի բարդ կլինի գումար վաստակել սմարթֆոնների թողարկումից, քանի որ դրանք դարձել են «լայն սպառման ապրանք»։ Այդ խնդիրն առայժմ հաջողվել է լուծել միայն Apple ընկերությանը, ընդգծել է նա։

Մեկնաբանելով 2014 թվականի երրորդ եռամսյակի մատակարարումների նախնական արդյունքները` ուսումնասիրության գծով տնօրեն Ռամոն Լամասը (Ramon Llamas) նշել է չինական նոր Xiaomi ընկերության արտադրողների հայտնվելը Թոփ-5–ում։

2014 թվականի երրորդ եռամսյակում Xiaomi–ն 211.3 տոկոսով ավելացրել է մատակարարումների ծավալը նախորդ տարվա նույն ժամանակահատվածի համեմատ` դրանց թիվը հասցնելով 17.3 միլիոնի և զբաղեցրել է երրորդ հորիզոնականը, որն ավելի վաղ զբաղեցնում էր Huawei–ը։ Թարմացված հաշվետվությունում Huawei ընկերությունն առաջին հնգյակում արդեն բացակայում է։

Մի քանի օր առաջ IHS iSuppli գործակալությունը համաշխարհային շուկայում սմարթֆոնների մատակարարման ցուցանիշով երրորդ տեղում նշել էր Xiaomi ընկերությանը։

Xiaomi–ի հաջողությունը նախորդ եռամսյակում պայմանավորված է այն հանգամանքով, որ ընկերությունը կենտրոնացել է տեղական շուկայում և հարևան պետություններում։ Օգոստոսին թողարկված Mi4 սմարթֆոնն ունի մեծ պահանջարկ, պարզաբանել են փորձագետները։

Հարկ է նշել նաև LG–ի արդյունքը. 2014 թվականի երրորդ եռամսյակում ավելացրել է գլոբալ շուկայի մատակարարումները 39 տոկոսով` մինչև 16.8 մլն սմարթֆոն։ Տվյալ ծավալն ընկերության համար ամբողջ ընթացքում ռեկորդային է դարձել։ -0-

Ծանոթացեք լուրերին առաջինն ու քննարկեք դրանք մեր Telegram-ում

16:12 30.10.2014