VivaCell-MTS–ն ինտերնետով է ապահովել NASA SpaceApps Challenge մրցույթի 2016 մասնակիցներին Հայաստանում
ԵՐԵՎԱՆ, 25 ապրիլի. /ԱՌԿԱ/. VivaCell-MTS բջջային օպերատորն գերարագ ինտերնետ կապով է ապահովել NASA SpaceApps Challenge 2016 տիեզերական հավելվածների հինգերորդ միջազգային մրցույթի ազգային փուլի մասնակիցներին, հայտնում է ընկերության մամուլի ծառայությունը։
Ապրիլի 22-23–ը Բյուրականի աստղադիտարանում կայացած մրցույթի մասնակիցները մշակել և ներկայացրել են իրենց հավելվածները հետևյալ թեմաներով` «Տեխնոլոգիա», «Օդանավավարում», «Տիեզերակայան», «Արեգակնային համակարգ», «Երկիր մոլորակ», «Ճանապարհորդություն դեպի Մարս»։
Ընդհանուր առմամբ, մրցույթը թույլ է տվել մասնակիցներին կարևոր նպատակների հասնել` ստեղծել կիրառական բնույթի լուծումներ, ստանալ NASA–ի և այլ առանցքային կազմակերպությունների պահոցների իրական տվյալներից օգտվելու հնարավորություն տարբեր մարտահրավերների արձագանքելու համար և ճանաչում ձեռք բերել` մրցակցելով նորարարական բաց հարթակում։
Այդ աշխատանքների հիմքում ճարտարապետության, կոդերի ծրագրավորման, ուսանողների, սկսնակ և որակավորված փորձագետների, ինչպես նաև դիզայներների և վերլուծաբանների ստեղծած գաղափարներն ու նախաձեռնություններն են։
Այդ մրցույթի հայկական փուլի կազմակերպիչն X-TECH ընկերությունն է։
Հաղորդման համաձայն, VivaCell-MTS–ը, հաշվի առնելով աստղագիտության ոլորտում երկրի նվաճումների կարևորությունը, նախկինում էլ էր օժանդակում Բյուրականի աստղադիտարանին։ 2007 թվականին ընկերությունը նպաստել է աստղադիտարանի կառավարման համակարգի արդիականացմանն ու նորոգմանը, նորագույն սարքավորումներ են ձեռք բերվել 2.6–մետրանոց դիտակի կառավարման համար, ինչպես նաև նորոգվել է Շմիդտի կարգի մեկ մետրանոց աստղադիտակը։
ՎիվաՍել-ՄՏՍ (Ղ-Տելեկոմ) ընկերությունը հայկական շուկայում գործում է 2005 թվականից: Ընկերության բաժնետոմսերի 80 տոկոսը պատկանում է Ռուսաստանի և ԱՊՀ բջջային կապի խոշորագույն օպերատոր «Մոբիլնիե Տելեսիստեմի» ԲԲԸ-ին, մնացած 20 տոկոսը պատկանում է լիբանանյան Fattouch Group ներդրումային խմբին: -0-
Ծանոթացեք լուրերին առաջինն ու քննարկեք դրանք մեր Telegram-ում
20:59 25.04.2016