VivaCell-MTS-ը հավաստագրեր է հանձնել Վաճառքի և բաժանորդների սպասարկման դպրոցի առաջին շրջանավարտներին
VivaCell-MTS-ի Վաճառքի և բաժանորդների սպասարկման դպրոցն իր դռները բացել է 2015թ. դեկտեմբերին՝ նպատակ ունենալով ուսանողների մոտ զարգացնելու անհրաժեշտ կոնկրետ հմտությունները և աշխատելու հնարավորություն տալով ընկերության սպասարկման կենտրոնում՝ որպես գործակալի օգնական:
Ծրագրի առաջին փուլը երեք բուհի՝ Երևանի պետական համալսարանի, Հայաստանի ազգային ճարտարագիտական համալսարանի եւ Եվրոպական տարածաշրջանային կրթական ակադեմիայի ուսանողների հավաքագրումն էր: Ծրագրին մասնակցության հայտ ներկայացրած բազմաթիվ ուսանողներից ընտրվել են քսաներեքը՝ ելնելով նրանց կարողություններից, ներկայացված գաղափարների նորարարությունից և ընկերությունում դրական փոփոխություններ կատարելու պատրաստակամությունից:
Նախքան սպասարկման կենտրոններում պրակտիկան սկսելը, ուսանողներն անցել են հատուկ նախապատրաստական դասընթաց՝ VivaCell-MTS -ի ծառայությունների և սակագնային պլանների, ՄոբիԴրամի ծառայությունների և էթիկայի կանոնների վերաբերյալ, ինչպես նաև ծանոթացել են ընկերության ընթացակարգերին և գործընթացներին: Կազմակերպված ծրագիրն օգտակար է եղել ոչ միայն ուսանողների, այլև ընկերության համար. տոնական օրերին սովորաբար ընկերության սպասարկման կենտրոններն ունենում են ավելի շատ այցելուներ, իսկ գործակալները ստիպված են լինում աշխատել առավել ծանրաբեռնված գրաֆիկով: Ծրագրում ընդգրկված ուսանողները զգալիորեն աջակցել են սպասարկման կենտրոնների աշխատակիցներին: Ուսանողների փայլուն կատարողականի ցուցանիշներից է նրանց կողմից իրականացված՝ շուրջ 350 հեռախոսի վաճառքը: Բարձր կատարողականություն ցուցաբերած ուսանողները կդիտարկվեն որպես VivaCell-MTS-ում առկա թափուր աշխատատեղերի թեկնածուներ:
«Ներուժի բացահայտման համար հարկավոր են իրական մարտահրավերներ: Աշխատել՝ նշանակում է ստեղծել արժեքներ, ինչին հնարավոր է հասնել միայն երբ տեսական գիտելիքները կիրառություն են գտնում գործնականում: Պետք է նշել, որ ստեղծագործ միջավայրն ուսանողին հնարավորություն է տալիս առավելագույնս դրսեւորելու իրեն՝ անկախ ակադեմիական առաջադիմությունից: Հատկապես կարևոր է, որ ուսանողներից ոմանք, ովքեր ապագայում հավանաբար կընդգրկվեն բուհերի դասախոսական կազմում, գործնական գիտելիքներ ունենալով հաճախորդների կարիքների և հոգեբանության վերաբերյալ, կկարողանան ուսումնական ծրագրերն առավել համապատասխանեցնել շուկայի պահանջներին», – VivaCell-MTS -ի գլխամասային գրասենյակում կազմակերպված ավարտական արարողության ժամանակ հայտարարել է VivaCell-MTS–ի գլխավոր տնօրեն Ռալֆ Յիրիկյանը։
Ուսանողությունը մշտապես գտնվում է VivaCell-MTS -ի ուշադրության կենտրոնում. տարբեր նախաձեռնությունների թվում ընկերությունը հանդես է գալիս նաև ուսանողների համար նախատեսված՝ Կարիերայի զարգացման ծրագրերով: Բարձր որակավորում ունեցող փորձառու մասնագետների պատրաստումն աշխատաշուկայի կայուն զարգացման կարևորագույն նախապայման է և որպես այդպիսին՝ VivaCell-MTS -ի Կարիերայի զարգացման ծրագրի նպատակ:
Հայաստանի հեռահաղորդակցության առաջատար օպերատոր VivaCell-MTS -ը աշակերտներին և տարբեր ուսումնական հաստատությունների ուսանողներին հնարավորություն է տալիս այցելելու ընկերություն, ստանալու մասնագիտական կողմնորոշման խորհուրդատվություն, մասնակցելու պրակտիկայի և գործնականում կիրառելու տարիների ընթացքում կուտակած բուհական գիտելիքները՝ ձեռք բերելով նոր հմտություններ և փորձառություն, ինչպես նաև հնարավորություն ստանալով աշխատանքի անցնելու VivaCell-MTS -ում:
VivaCell-MTS (Ղ-Տելեկոմ) ընկերությունը հայկական շուկայում գործում է 2005 թվականից: Ընկերության բաժնետոմսերի 80 տոկոսը պատկանում է Ռուսաստանի և ԱՊՀ բջջային կապի խոշորագույն օպերատոր «Մոբիլնիե Տելեսիստեմի» ԲԲԸ-ին, մնացած 20 տոկոսը պատկանում է լիբանանյան Fattouch Group ներդրումային խմբին: -0-
Ծանոթացեք լուրերին առաջինն ու քննարկեք դրանք մեր Telegram-ում
19:52 19.02.2016