ԵՐԵՎԱՆ, 21 մայիսի. /ԱՌԿԱ/. 2013 թվականի մարտի վերջին–ապրիլի սկզբին «Օդնոկլասնիկի» ՍՊԸ–ն, որը ղեկավարում է համանուն սոցիալական ցանցը, երկու անգամ սեփականատեր է փոխել, հայտնում է «Իզվեստիա» թերթը։ Մինչև 2013 թվականի մարտի 27–ը ցանցի սեփականատերը բրիտանական  Odnoklassniki Ltd. ընկերությունն էր, այնուհետև սեփականատեր դարձավ Nessly Holdings Limited կիպրոսյան ընկերությունը, իսկ ևս երեք շաբաթից` կրկին կիպրոսյան Odnoklassniki Holdings Limited ընկերությունը։ Միաժամանակ, այդ ողջ ընթացքում վերջնական սեփականատերը Mail.Ru Group–ն էր։

«Փոխանցումն իրականացվել է իրավաբանական վերակազմավորման շրջանակներում, որի նպատակը Mail.Ru Group–ի կազմում ընդգրկված ռուսական օպերացիոն ընկերությունների միասնական հոլդինգային կառույցի ստեղծումն է։ Սա պլանային վերակազամավորում է, որը տեխնիկական բնույթ է կրում»,– «Իզվեստիային» հայտնել են Mail.Ru Group–ի մամուլի ծառայությունից, հաղորդում է rbc.ru–ն։

Վերլուծաբանների կարծիքով` բրիտանական իրավասության փոխարինումը կիպրոսյանով կապված է հարկային հարցերի հետ։

Կիպրոսյան մի ընկերության փոխարինումը մյուսով, «Ֆրիդոմ Ֆինանս» ընկերության գլխավոր տնօրենի տեղակալ Դ.Դանչենկոյի կարծիքով, նույնպես կարող է կապված լինի հարկերի հետ։ Լոնդոնից ակտիվը Կիպրոս տեղափոխելու համար պետք է առքուվաճառքի գործարք ձևակերպել և Լոնդոնում համապատասխան գումարից հարկեր վճարել։ Շատ չվճարելու համար կարելի է առաջին անգամ վաճառել ոչ մեծ գնով, իսկ երկրորդ անգամ` ավելի մեծ գնով։

Տեղափոխման ևս մեկ հնարավոր պատճառը կարող է լինել փողերի դուրսբերումը ճգնաժամ ապրող Կիպրոսից։

Liveinternet–ի խոսքով` «Օդնոկլասնիկների» օրական լսարանը մայիսի 19–ին աշխարհում կազմել է 35.9 մլն, Ռուսաստանում` 22.2 մլն, Ուկրաինայում` 3.99 մլն, Բելառուսում` 1.2 մլն։ -0-

Ծանոթացեք լուրերին առաջինն ու քննարկեք դրանք մեր Telegram-ում

13:16 21.05.2013