Apple–ի շահույթն անկում է ապրում երկրորդ եռամսյակը շարունակ, iPhone–ի վաճառքը ռեկորդներ է սահմանում
ԵՐԵՎԱՆ, 24 հուլիսի. /ԱՌԿԱ/. Համակարգիչների և բջջային սարքերի առաջատար արտադրող Apple Inc. ամերիկյան ընկերության զուտ շահույթը 2012–2013 ֆինանսական տարվա երրորդ եռամսյակում նվազել է 21,8 տոկոսով` կազմելով 6,90 մլրդ դոլար` նախորդ տարվա 8,82 մլրդ դոլարի համեմատ։ Այդ մասին ասվում է ընկերության ֆինանսական հաշվետվության մեջ։
Հաշվետու ժամանակահատվածն ավարտվեց 2013թ.–ի հունիսի 29–ին։ Apple–ի հաղորդագրությունը հրապարակվեց ԱՄՆ–ի ֆոնդային բորսաների կանոնավոր առևտրային նստաշրջանի ավարտից հետո։
Ընկերության հասույթը ֆինանսական տարվա երրորդ եռամսյակում ավելացել է 1 տոկոսով և կազմել 35,3 մլրդ դոլար։ Մեկ բաժնետոմսի հաշվարկով շահույթը կրճատվել է` կազմելով 7,47 դոլար (անցյալ տարի`մեկ բաժնետոմսի դիմաց 9,32 դոլար), հաղորդում է rbc.ru–ն։
Չնայած զուտ շահույթի նվազմանը` Apple–ի ֆինանսական արդյունքները գերազանցել են Ուոլ սթրիթի սպասումները։ Reuters գործակալության կողմից հարցված վերլուծաբանները կանխատեսում էին, որ բնագավառի առաջնորդներից մեկի մեկ բաժնետոմսի դիմաց շահույթը կկազմի 7,32 դոլար, փորձագետները 35 մլրդ դոլար մակարդակում հասույթ էին ակնկալում։
Apple–ի բաժնետոմսերի գնանշումները երկարաձգված նստաշրջանի ընթացքում (բորսայի պաշտոնական փակումից հետո) ավելացել են ավելի քան 4 տոկոսով։
Apple–ը տեղեկացրել է նաև, որ հաշվետու եռամսյակում iPhone–ի 31,2 մլն սմարթֆոն է իրացվել` նախորդ ֆինանսական տարվա (26 մլն) նույն ժամանակահատվածի համեմատ 20 տոկոսով ավել։ «Մենք հատկապես գոհ ենք տվյալ եռամսյակի համար iPhone–ի ռեկորդային վաճառքներից, ինչպես նաև iTunes առցանց խանութի հասույթի չափավոր աճից և ծրագրային ապահովման ու ծառայությունների ստորաբաժանումներից»,– նշել է ընկերության գործադիր տնօրեն Թիմ Կուկը։
Հիշեցնենք, որ Apple–ի զուտ շահույթը 2012–2013 ֆինանսական տարվա երկրորդ եռամսյակում կրճատվել էր 18 տոկոսով և կազմել 9,55 մլրդ դոլար` նախորդ տարվա 11,62 մլրդ դոլարի համեմատ։ Հաշվետու ժամանակահատվածում եռամսյակային հասույթը հասել է 43,6 մլրդ դոլարի, ինչը 11 տոկոսով գերազանցել է նախորդ ֆինանսական տարվա հունվար–մարտ ամիսների ցուցանիշը (39,19 մլրդ դոլար)։ Մեկ սովորական բաժնետոմսի հաշվարկով շահույթը երկրորդ եռամսյակում կազմել է 10,09 դոլար։ 2012–2013 ֆինանսական տարվա երկրորդ եռամսյակում ընկերությունը վաճառել է 37,4 մլն iPhone սմարթֆոն (+7%)։iPad պլանշետների վաճառքն աճել է մինչև 19,48 մլն միավոր (+65%)։
Apple–ն ամերիկյան ընկերություն է, որը զբաղվում է ծրագրային ապահովման, անձնական համակարգիչների, աուդիոփլեյերների և հեռախոսների արտադրությամբ։ Իր արտադրանքի մի մասն ընկերությունը վաճառում է սեփական խանութների ցանցի միջոցով, որոնք տեղակայված են ԱՄՆ–ում, Կանադայում, Մեծ Բրիտանիայում, Ճապոնիայում և այլ երկրներում։ Apple աշխատակիցների հաստիքացուցակը կազմում է մոտ 60,4 հազար մարդ։ Ընկերության կենտրոնակայանը գտնվում է Կուպերտինո քաղաքում (Կալիֆորնիա նահանգ, ԱՄՆ)։--0—
Ծանոթացեք լուրերին առաջինն ու քննարկեք դրանք մեր Telegram-ում
14:50 24.07.2013