Apple–ն աշխարհի ընկերությունների թվում կապիտալացման ցուցանիշով պատմական ռեկորդ է սահմանել
ԵՐԵՎԱՆ, 21 օգոստոսի. /ԱՌԿԱ/. Apple ամերիկյան ընկերությունը երկուշաբթի Nasdaq բորսայի առքուվաճառքի արդյունքներով սահմանել է կապիտալացման ռեկորդ, որը նախկինում պատկանում էր Microsoft–ին, և 623.52 միլիարդ դոլար գնահատականով ամրացրել է աշխարհի ամենաթանկ ընկերության իր դիրքերը, վկայում են բորսայի տվյալները, հաղորդում է «ՌԻԱ Նովոստին»։
Կապիտալացման ցուցանիշով նախորդ ռեկորդը` 620.58 միլիարդ դոլար, պատկանում էր Microsoft ընկերությանը, գրում է Ռոյթերս գործակալությունը` հղում անելով S&P Dow Jones–ի տվյալներին։ Սոֆթվերային կորպորացիան սահմանել է այն 1999 թվականին։
Apple–ի բաժնետոմսերի գինը երկուշաբթի Nasdaq–ի փակմանն աճել է 2.63 տոկոսով և կազմել է մեկ արժեթղթի դիմաց ընկերության համար ռեկորդային 665.15 դոլար։ iPhone и iPad գաջեթների արտադրողի կապիտալացումը կամ ընկերության բոլոր բաժնետոմսերի արժեքի համագումարն ըստ շուկայական գնի կազմել է 623.52 միլիարդ դոլար։
Աշխարհի ամենաթանկ ընկերության տիտղոսն Apple–ը պահում է նախորդ տարվանից, սակայն այդ ցուցանիշը գնահատվում էր ընթացիկ օրվա շուկայի մյուս խաղացողների համեմատ։ Նրա ամենամոտ մրցակից Exxon Mobil ընկերությունն այս պահին հետ է մնում ավելի քան 200 միլիարդ դոլարով` երկուշաբթիի առքուվաճառքի փակման պահին գրանցված 405.97 միլիարդ դոլար ցուցանիշով։
Հատկանշական է, որ Apple–ի բաժնետոմսերի գինը փակման պահին ընդամենը մեկուկես դոլարով ցածր էր, քան արտադրողի առաջին համակարգչի մանրածախ գինը` 1976 թվականին Apple–ի առաջին մոդելը վաճառվում էր 666.66 դոլարով։
Apple–ի բաժնետոմսերը նախորդ շաբաթվանից ակտիվորեն աճում են սեպտեմբերին նոր iPhone–ի հնարավոր շնորհանդեսի, հոկտեմբերին կոմպակտ iPad–ի հավանական ծանուցման, ինչպես նաև ընկերության կողմից, հավանաբար, հաջորդ տարվա հոկտեմբերին գործարքվելիք հեռուստահաղորդումների դիտման նոր տեխնոլոգիական լուծման վերաբերյալ լուրերի ֆոնին, գրում են ամերիկյան ԶԼՄ–ները։
Շուկայի վերլուծաբանները ենթադրում են, որ Apple–ի բաժնետոմսերը կշարունակեն թանկանալ։ Դրանց կողմից առաջարկված առաջիկա տարվա համար ընկերության արժեթղթերի նպատակային գինը, Nasdaq–ի տվյալներով, կազմում է 745 ԱՄՆ դոլար։
Apple–ի զուտ շահույթը 2012 թվականի հունիսի 30–ին ավարտված ընթացիկ ֆինանսական տարվա երրորդ եռամսյակում աճել է 20.5 տոկոսով` մինչև 8.8 միլիարդ դոլար` նախորդ տարվա նույն ժամանակահատվածի 7.3 միլիարդ դոլարի համեմատ։ Չորրորդ եռամսյակում ընկերությունն ակնկալում է 34 միլիարդ դոլարի հասույթ և մեկ բաժնետոմսի հաշվարկով` 7.65 միլիարդ շահույթ։-0-
Ծանոթացեք լուրերին առաջինն ու քննարկեք դրանք մեր Telegram-ում
13:38 21.08.2012