Պետերբուրգի արբիտրաժը գրանցել է «ՎԿոնտակտե» ՍՊԸ–ի նկատմամբ հայցը
ԵՐԵՎԱՆ, 25 մարտի. /ԱՌԿԱ/. Պետերբուրգի և Լենինգրադի մարզի արբիտրաժային դատարանը գրանցել է «Թոք Ֆյուժն» ամերիկյան կորպորացիայի հայցը «ՎԿոնտակտե» ՍՊԸ–ի դեմ, որը համանուն սոցիալական ցանցի սեփականատերն է, և անհատ ձեռնարկատեր Իգոր Վուլֆովիչին գործարար հեղինակության պաշտպանության և պատասխանողներից 9–ական միլիոն ռուբլի գանձելու մասին, ասվում է ՌԴ Բարձրագույն արբիտրաժային դատարանի (ԲԱԴ) կայքում, հաղորդում է ՌԻԱ Նովոստին։
Դատարանի նյութերի համաձայն, հայցորդը պահանջում է իրականությանն անհամապատասխանող ճանաչել «ՎԿոնտակտե» կայքի մի շարք հաղորդագրություններ, որոնք, նրա գնահատականով, արատավորում են «Թոք Ֆյուժն» կորպորացիայի գործարար հեղինակությունը։ Մասնավորապես, խոսքն այն հաղորդագրությունների մասին է, որտեղ Talk Fusion համակարգը բնութագրվում է որպես «շղարշված ֆինանսական բուրգ», որի քարոզչությունը տարածող խմբերն արգելափակվում են սոցցանցում։
Talk Fusion–ը պնդում է նաև, որ «ՎԿոնտակտե»–ի ղեկավարությունը կայքից հեռացնի գործարար Վուլֆովիչի հրապարակած տեղեկությունը, որը, հայցորդի կարծիքով, արատավորում է նրա հեղինակությունը։
Կորպորացիան մտադիր է դատարանում հասնել այդ լուրերի հերքման հրապարակմանը, ինչպես նաև գործարար հեղինակությանը հասցրած վնասի փոխհատուցմանը, որը գնահատվել է 18 միլիոն ռուբլի (9–ական միլիոն ռուբլի յուրաքանչյուր պատասխանատուից)։
Ներկայում Պետերբուրգի արբիտրաժը Talk Fusion–ի հայցը թողել է առանց զարգացման, քանի որ այն տրվել է ՌԴ Արբիտրաժային քրեակատարողական օրենսգրքի պահանջների խախտումով։ Դրանք մինչև ապրիլի 22–ը վերացնելուց հետո գործը կնշանակվի դատավարության։ ՌԻԱ Նովոստին առայժմ մեկնաբանություններ չի ստացել դատավարության մասնակիցներից։
Կորպորացիայի կայքի համաձայն, Talk Fusion–ը տրամադրում է էլեկտրոնային փիառ–ծառայություններ, այդ թվում` դրանց տարածմամբ սոցցանցերում։ «ՎԿոնտակտե»–ն ռուսական խոշորագույն սոցիալական ցանցերից է, որի օրական լսարանը գերազանցում է 40 միլիոնը։ «ՎԿոնտակտե»–ի տվյալներով` սոցցանցում ավելի քան 190 միլիոն օգտատեր է գրանցված։ -0-
Ծանոթացեք լուրերին առաջինն ու քննարկեք դրանք մեր Telegram-ում
16:12 25.03.2013