Սմարթֆոնների շուկայում Apple–ի մասնաբաժինը նվազել է

ԵՐԵՎԱՆ, 16 մայիսի. /ԱՌԿԱ/. 2013 թվականի առաջին եռամսյակում վերջնական սպառողին է վաճառվել 38.3 միլիոն iPhone սմարթֆոն։ Թեպետ տարեցտարի վաճառքներն աճել են 5.2 միլիոնով, այնուհանրձ Apple ընկերության մասնաբաժինը կրճատվել է մինչև 18.2%` 2012 թվականի առաջին եռամսյակի 22.5 տոկոսի համեմատ, հայտնում է  cnews.ru–ն` հղում անելով Gartner–ին։

Apple–ի մասնաբաժինը կրճատվել է, որովհետև այլ ապրանքատեսակների սարքերի պահանջարկն ավելի է մեծացել։ Այսպես, նշված ժամանակահատվածում սպառողի կողմից ձեռք է բերվել 64.7 մլն Samsung սմարթֆոն, ինչը նախորդ տարվա համեմատ 60 տոկոսով շատ է։ Samsung Electronics–ի մասնաբաժինը 27.6 տոկոսից հասել է 30.8 տոկոսի։

LG սմարթֆոնների վաճառքներն աճել են ավելի քան երկու անգամ, Huawei–ն և ZTE–ն` մոտ 76 տոկոսով։ Դրանց ֆոնին Apple–ի հաջողությունները զգալի չեն` ընկերության վաճառքների աճը հարաբերական արտահայտմամբ կազմել է ընդամենը 16 տոկոս։ Թեև այն շարունակում է զբաղեցնել երկրորդ տեղը Samsung–ից հետո։

Android օպերացիոն համակարգի դիրքերը 2013 թվականի առաջին եռամսյակում ամրացել են` մասնաբաժնն աճել է 56.9 տոկոսից մինչև 74.4 տոկոս։ Այսինքն, հաշվետու ժամանակահատվածում վերջնական սպառողին վաճառված 210 մլն սմարթֆոններից երեք քառորդը կամ 156.2 մլն հատը հիմնված է Google ընկերության մշակած պլատֆորմի վրա։

Կարելի է նշել, որ Microsoft պլատֆորմով սմարթֆոնների վաճառքներն ավելի քան կրկնակի աճ են ցուցադրել` մինչև 6 մլն սարք, մինչդեռ BlackBerry–ի մասնաբաժինը կրճատվել է ավելի քան երկու անգամ` մինչև 3 տոկոս։

2013 թվականի առաջին եռամսյակում վերջնական սպառողին վաճառված սմարթֆոնների ընդհանուր վաճառքներն աճել են 42.9 տոկոսով` 2012 թվականի նույն ժամանակահատվածի համեմատ։

Բոլոր տեսակի բջջային հեռախոսների, այդ թվում` սմարթֆոնների վաճառքները, նշված ժամանակահատվածում կազմել են 426 մլն սարք, ինչն ընդամենը 0.7 տոկոսով է շատ նախորդ տարվա ցուցանիշից։

Canalys ընկերությունն իր հաշվետվությունում հայտնել է, որ համաշխարհային շուկայում «խելացի» բջջային սարքերի ընդհանուր մատակարարումները 2013 թվականի առաջին եռամսյակում աճել են 37.4 տոկոսով` մինչև 308.7 մլն սարք։ Android պլատֆորմը միաժամանակ զբաղեցրել է այդ բաղկացուցիչ հատվածի 59.5 տոկոսը։ Ընկերության վերլուծաբանները «խելացի» բջջային սարքերի շարքին են դասում նաև սմարթֆոնները, պլանշետները և նոութբուքերը։ -0-

Ծանոթացեք լուրերին առաջինն ու քննարկեք դրանք մեր Telegram-ում

12:34 16.05.2013