Հայաստանում համացանցի միջոցով վճարային քարտերով գործարքների ծավալն օգոստոսին ավելացել է 6,1%–ով

ԵՐԵՎԱՆ, 15 հոկտեմբերի. /ԱՌԿԱ/. Հայկական և օտարերկրյա բանկերի կողմից թողարկված վճարային քարտերով իրականացված ինտերնետային գործարքի ծավալը 2015 թ.–ի օգոստոսի վերջի դրությամբ կազմել է 4,4 մլրդ դրամ` այս տարվա հուլիսի համեմատ ավելանալով 6,1 տոկոսով, նշվում է ՀՀ ԿԲ–ի 2015 թ.–ի օգոստոսի ամսական տեղեկագրում։

ԿԲ–ի տվյալներով` համացանցում վճարային քարտերով իրականացված գործարքների ընդհանուր թիվը հաշվետու ժամանակահատվածում կազմել է 204 764` ամսվա ընթացքում ավելանալով 2,2 տոկոսով։

Հայկական և օտարերկրյա բանկերի կողմից թողարկված վճարային քարտերով սպասարկման բոլոր տեսակների միջոցով իրականացված գործարքների համախառն ծավալը  2015 թ.–ի օգոստոսին կազմել է մոտ 117,7 մլրդ դրամ (7,5 տոկոսի անկում), իսկ գործարքների ընդհանուր թիվը կազմել է 2 319 636 (6,4 տոկոսի անկում)։

Միաժամանակ հայկական և օտարերկրյա բանկերի կողմից թողարկված վճարային քարտերով բանկոմատների միջոցով իրականացված գործարքների ծավալը ամսվա վերջում կազմել է 89,5 մլրդ դրամ (9,1 տոկոսի անկում), իսկ գործարքների ընդհանուր թիվը կազմել է 1 789 547 (7,7 տոկոսի անկում)։ ԿԲ–ի տվյալներով` վճարային քարտերով POS–տերմինալների և imprinter–ների միջոցով իրականացված գործարքների ծավալն օգոստոսին կազմել է մոտ 23,8 մլրդ դրամ (3,7 տոկոսի անկում), իսկ գործարքների ընդհանուր թիվը կազմել է 325 298 (4,3 տոկոսի անկում)։–0–

 

Ծանոթացեք լուրերին առաջինն ու քննարկեք դրանք մեր Telegram-ում

12:23 15.10.2015