Ամերիկյան շուկայում վեց տարվա մեջ առաջին անգամ Google-ի մասնաբաժինը 75 տոկոսից ցածր է կազմել
ԵՐԵՎԱՆ, 4 փետրվարի. /ԱՌԿԱ/. Ամերիկյան որոնողական համակարգերի շուկայում Google-ի մասնաբաժինը վեց տարվա մեջ առաջին անգամ 75 տոկոսից ցածր է կազմել։ Ինչպես հայտնում է Therunet.com–ը, այս մասին գրել է «Կոմերսանտը»` հղում անելով StatCounter ծառայությանը։
Վերջին երեք ամսում որոնողական համակարգն ավելի քան երեք տոկոս է կորցրել, քանի որ Google-ի փոխարեն Firefox բրաուզերի որոնողական համակարգ է դարձել Yahoo!–ն։ Ռուսաստանում և Չինաստանում նույնպես Firefox–ին կցված է ոչ թե Google–ը, այլ` «Яндекс»–ը և Baidu–ն։
Ամերիկյան շուկայում Yahoo!–ի մասնաբաժինը, հակառակը, հինգ տարվա կտրվածքով առավելագույն ցուցանիշի է հասել` 10.9 տոկոս։ ԱՄՆ–ում ճանաչում վայելող երկրորդ որոնողական համակարգը Microsoft–ի Bing–ն է, որից օգտվում է ընդհանուր թվի 12.4 տոկոսը։
Այս տարի լրանում է Google–ի և Apple–ի համաձայնագրի ժամկետը, որի համաձայն` Google–ը հիմնական համակարգ է հանդիսանում Safari բրաուզերի համար։ Դեռ չի որոշվել, թե Safari–ի համար ինչ նոր համակարգ կընտրեն։ Morgan Stanley–ի տվյալով` այսօր Google–ը Apple–ին շուրջ միլիարդ դոլար է վճարում iPhone–ի որոնողական համակարգը լինելու համար։-0-
Ծանոթացեք լուրերին առաջինն ու քննարկեք դրանք մեր Telegram-ում
14:21 04.02.2015