Apple–ը հաղթել է Motorola–ի հետ դատը Մյունխենում

ԵՐԵՎԱՆ, 14 սեպտեմբերի. /ԱՌԿԱ/.  iPhone 5 սմարթֆոնի շնորհանդեսից մեկ օր անց Apple–ին հաջողվել է հերթական հաղթանակն ունենալ պատենտային պատերազմում։ Մյունխենի դատարանը պաշտպանել է ընկերությանը Motorola–ի հետ վեճում, հաղորդում է Reuters գործակալությունը։

Գերմանական արբիտրաժի վճռում նշվում է, որ Google ինտերնետ–հսկային պատկանող Motorola բջջային սարքերի արտադրողն անօրինական կրկնօրինակել է պատենտավորված տեխնոլոգիաներ։ Այժմ այն պատրավորվում է հետ կանչել Գերմանիայի տարածքում վաճառքից բոլոր պլանշետային համակարգիչներն ու սմարթֆոնները, որոնցում օգտագործվել են Apple–ի տեխնոլոգիաները, հայտնում է rbc.ru–ն։

Դատավոր Պիտեր Գյունցն ընդգծել է, որ Մոտորոլան գլխավորապես անօրինական օգտագործել է «քաշելու» (overscroll bounce) տեխնոլոգիան, որը թույլ է տալիս օգտագործողներին սենսորային էկրանի սահմաններից դուրս տեղափոխել փաստաթղթերը կամ ներդիրները, որոնք այնուհետև վերադառնում են կենտրոնացված դիրքի։

Դատական ատյանի մամուլի քարտուղարը միաժամանակ նշել է, որ վաճառքների արգելման որոշումը ուժի մեջ չի մտնելու միանգամից, քանի որ Apple–ը պետք է կազմի ընդդիմախոսի կոնկրետ սարքերի ցուցակը, ինչից հետո Motorola–ն կկարողանա բողոքարկել։

Հիշեցնենք, որ այս տարվա օգոստոսի 25–ին Կալիֆոռնիա նահանգի դաշնային դատարանը հայտարարել է Apple–ի և Samsung–ի վեճի վճիռը` հարավկորեական ընկերությանը պարտադրելով վճարել 1.05 մլրդ դոլարի փոխհատուցում։

Տեխնոլոգիական խոշոր հսկաներն արդեն առաջին տարին չէ, որ պատենտային պատերազմ են վարում։ Ընդ որում, դատավարություններ են ընթանում ոչ միայն ԱՄՆ–ում, այլ նաև Եվրոպայի և Ասիայի երկրներում։

Օգոստոսի վերջին Հարավային Կորեայի դատարաններից մեկը սահմանել է ընկերությունների փոխադարձ պատասխանատվություն և դադարեցրել է յուրաքանչյուրի արտադրանքի վաճառքները։ Ավելի ուշ Ճապոնիայի դատական մարմինները մերժել են Apple–ին Samsung–ի դեմ հայցի բավարարումը։ -0-

Ծանոթացեք լուրերին առաջինն ու քննարկեք դրանք մեր Telegram-ում

16:35 14.09.2012