ԵՐԵՎԱՆ, 28 հոկտեմբերի. /ԱՌԿԱ/. Apple–ի զուտ շահույթը սեպտեմբերի 26–ին ավարտված 2015 ֆինանսական տարվա չորրորդ եռամսյակում ավելացել է 30,6 տոկոսով` 2014 թ.–ի նույն ժամանակահատվածում գրանցված 8,5 մլրդ դոլարից հասնելով 11,1 մլրդ դոլարի։ Այս մասին, ինչպես հաղորդում է ՌԻԱ Նովոստին, նշվում է ընկերության հաղորդագրության մեջ։

Apple–ի հասույթը կազմել է 51,5 մլրդ դոլար, ինչը 22,3 տոկոսով ավել է` 2014 թ.–ի չորրորդ եռամսյակի համեմատ (42,1 մլրդ դոլար)։ Հաղորդագրության մեջ նշվում է, որ միջազգային վաճառքները կազմել են եռամսյակի եկամտի 62 տոկոսը։

«Աճը գրանցվել է iPhone–ի ռեկորդային վաճառքների, Apple Watch–ի հասանելիության աշխարհագրության ընդլայնման, ինչպես նաև պատմության մեջ գրանցված Mac–ի լավագույն վաճառքների և ծառայություններից ստացված եկամուտների շնորհիվ», – նշում է Apple կորպորացիան և ավելացնում, որ 2015 ֆինանսական տարին լավագույնն է կորպորացիայի պատմության ընթացքում։
 
«Apple–ի ռեկորդային արդյունքները սեպտեմբերյան եռամսյակում ապահովել են բաժնետոմսերի մասով շահույթի աճ` 38 տոկոսի չափով, իսկ գործառնություններից ստացված եռամսյակային դրամական հոսքը կազմել է 13,5 մլրդ դոլար», – հաղորդագրության մեջ մեջբերվում են Apple–ի ֆինանսական տնօրեն Լյուկ Մաեստրիի (Luca Maestri) խոսքերը։

 «Եռամսյակի ընթացքում մենք մեր ներդրողներին վերադարձրել ենք 17 մլրդ դոլար բաժնետոմսերի հետադարձ գնման և դիվիդենտների վճարման տեսքով։ Այս պահին ներդրողներին փոխանցված վճարների ընդհանուր ծավալը գերազանցել է 143 մլրդ դոլարը 200 մլրդ դոլարից, որոնք մենք ներդրել ենք կապիտալի վերադարձի ծրագրում», – ավելացրել է նա։

Apple–ը կանխատեսում է, որ 2015 թ.–ի առաջին եռամսյակում կորպորացիայի շահույթը կկազմի 75,5–77,5 մլրդ դոլար, գործառնական ծախսերը կտատանվեն 6,3–6,4 մլրդ դոլարի սահմանում։–0–