«ԱրմենՏել» ընկերությունը նոր մոդելներով կհամալրի բրենդային սմարթֆոնների և պլանշետների շարքը
ԵՐԵՎԱՆ, 19 մայիսի. /ԱՌԿԱ/. «ԱրմենՏել» ՓԲԸ–ն (ապրանքանիշը` Beeline) նոր մոդելներով կհամալրի բրենդային սմարթֆոնների և պլանշետների շարքը Հայաստանում, երեքշաբթի լրագրողներին ասաց «ՎիմպելԿոմ Լթդ» խմբի բջջային սարքերի բաժնի ղեկավար Անդրեյ Չուկաևը։
«Առաջիկա մի քանի ամսում մենք կթարմացնենք հայկական շուկայում ներկայացված սարքերն ու նախատեսում ենք մատչելի արտադրանքի նոր շարք գործարկել։ Մասնավորապես, նախատեսվում է ներկայացնել նոր սմարթֆոն` ավելի բարելավված պարամետրերով, 4,5 դյույմանոց էկրանով, ինչպես նաև 7 դյույմանոց պլանշետ, որն աշխատում է Android օպերացիոն համակարգով», – ասաց Չուկաևը։
Նա նշեց, որ գներն ու պարամետրերը դեռևս չեն հրապարակվում, սակայն դրանք կներկայացվեն բավականին մատչելի պայմաններով։
Նրա խոսքով` նախատեսվում է, որ բրենդային նոր սմարթֆոնը երկու SIM քարտ օգտագործելու հնարավորություն կունենա։
Նա նշեց, որ սմարթֆոնների շուկայի աճի կեսից ավելին առաջիկայում բաժին կընկնի 200 դոլարից ոչ ավել արժեք ունեցող սարքերի հատվածին։
«Կփորձենք կենտրոնանալ այդ հատվածի վրա մեր բրենդային սարքավորումներով, հետո, գուցե, կշտկենք մեր շարքը, սակայն այս նշաձողը մեզ համար դեռ առաջնահերթ է մնում», – ասաց Չուկաևը։
Այս պահին ընկերությունը շուկայում ներկայացնում է Beeline Smart սմարթֆոնը, որն արժե 33 900 դրամ։ Սմարթֆոնն արդեն սահմանել է վաճառքի բոլոր ռեկորդները։ Դեկտեմբերին մեկ ամսում վաճառվել է ավելի քան 3,7 հազար մոդել, իսկ ապրիլին իրացվել է 4 հազար սմարթֆոն։
«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ։–0 –
Ծանոթացեք լուրերին առաջինն ու քննարկեք դրանք մեր Telegram-ում
21:30 19.05.2015
