Facebook–ը նախատեսնում է շարժական գովազդի ցանց ստեղծել
ԵՐԵՎԱՆ, 22 ապրիլի. /ԱՌԿԱ/. Facebook–ը նախատեսում է շարժական գովազդի ցանց ստեղծել, այս մասին, ինչպես հաղորդում է РБК–ն, այսօր գրում են արտասահմանյան ԶԼՄ–ները։ Նշվում է, որ դա թույլ կտա ընկերությանը տարբեր ծառայություններում գործարկել օգտատերերի վերաբերյալ ունեցած տվյալների բազան։ Ընկերություններն ու մանրածախ առևտրով զբաղվողները կկարողանան բազմաթիվ շարժական հավելվածներում և խաղերում տեղադրել իրենց գովազդն այն մարդկանց համար, ովքեր Facebook–ում իրենց մասին հավաստի տեղեկատվություն են նշել։
Բազմաթիվ ընկերություններ տրամադրում են նմանատիպ ծառայություններ, սակայն համարվում է, որ Facebook–ն ավելի շահեկան դիրքում է, քանի որ ավելի քան 1 մլրդ մարդ իր մասին հավաստի տեղեկություն է ներկայացրել` սեռը, տարիքը, գտնվելու վայրն ու հետաքրքրությունները։
Շարժական գովազդի նոր ցանցը չի ավելացնի օգտատերերի մասին հավաքագրվող տվյալների ծավալը, սակայն այն կարող է ավելացնել թիրախային գովազդի ծավալը, որը ցանցի բաժանորդները տեսնում են շարժական ինտերնետում։ Օգտատերերը չեն կարող հրաժարվել նման գովազդ ստանալուց։
2013 թ.–ի վերջին Facebook–ը հաստատեց օգտատերերի նորությունների ժապավենում գովազդային տեսահոլովակների գործարկումը։ Ընկերության պաշտոնական հայտարարության մեջ նշվում է, որ տեսահոլովակը սկսվում է ավտոմատ կերպով, օգտատերը կարող է կարգավորել միայն ձայնը։
Նման գովազդը պետք է գործարկվեր դեռևս 2013 թ.–ի ամռանը, սակայն ցանցի հիմնադիր Մարկ Ցուկերբերգը հետաձգեց դրա գործարկումը` մասամբ մտավախություն ունենալով, որ դա կվանի օգտատերերին։ Նախորդ կես տարվա ընթացքում սոցցանցի մշակողները նման տեսահոլովակի դիտման տարբեր միջոցներ էին փորձարկում։ Այժմ եկել է ժամանակը, որպեսզի գովազդատուները հնարավորություն ունենան տեղադրել նման տեսահոլովակներ։
Facebook–ում նշում են, որ հայտարարությունները ցուցադրվելու են սահմանափակ քանակով և անհարմարություն չեն առաջացնի։–0–
Ծանոթացեք լուրերին առաջինն ու քննարկեք դրանք մեր Telegram-ում
18:52 22.04.2014