Երևանում հունիսի 21–ին Digitec Expo–ի շրջանակներում հայ–հոլանդական բիզնես–ֆորում կանցկացվի
ԵՐԵՎԱՆ, 17 հունիսի. /ԱՌԿԱ/. Երևանում հունիսի 21–ին Digitec Expo–ի շրջանակներում հայ–հոլանդական բիզնես–ֆորում կանցկացվի, տեղեկացրեցին Ինֆորմացիոն տեխնոլոգիաների ձեռնարկությունների միության մամուլի ծառայությունից։
Հայ-հոլանդական ֆորումի հիմնական նպատակն է ներկայացնել Նիդերլանդների ընդհանուր ՏՀՏ ոլորտի և, մասնավորապես, բիզնես կիրառական խաղերի մեթոդի նկարագիրը։
Կիրառական կամ «լուրջ» խաղերը իրական խնդիրների կամ իրավիճակների սիմուլյացիաներ են, որոնք կարող են օգտագործվել որպես փորձարարական և կրթական տեխնոլոգիաներ ճարտարագիտության, պաշտպանության, առողջապահության, գիտության, բիզնեսի կառավարման և այլ ոլորտներում:
Ֆորումի ընթացքում կքննարկվի նաև հոլանդական և հայկական ՏՀՏ ոլորտների համագործակցության հնարավորությունները հետևյալ հիմնական ուղղություններով` նոր շուկաներ մուտք, օտարերկրյա կապիտալի ներգրավում, կրթության ոլորտում նախաձեռնություններ:
Հայ-հոլանդական բիզնես ֆորումի արդյունքում Փոխըմբռնման հուշագիր կստորագրվի Նիդերլանդների ՏՀՏ ասոցիացիայի (Nederland ICT) և Ինֆորմացիոն տեխնոլոգիաների ձեռնարկությունների միության (ԻՏՁՄ) միջև:
Հայ–հոլանդական բիզնես–ֆորումի կազմակերպիչներն են Ինֆորմացիոն տեխնոլոգիաների ձեռնարկությունների միությունն ու ՀՀ –ում Նիդերլանդների դեսպանատունը։
DigiTec 2014 յոթերորդ ամենամյա բիզնես–ֆորումը տեղի կունենա Երևանում հունիսի 20–21–ը։ Ֆորումի նպատակն է աջակցել բիզնեսի տարբեր ոլորտներին օպտիմալ տեխնոլոգիական լուծումներ փնտրելու գործում, ինչպես նաև օգնել տեխնոլոգիական ընկերություններին մեկ հարթակում հանդիպումներ կազմակերպելու և պոտենցիալ հաճախորդներին իրենց մշակումները ներկայացնելու գործում։
Ակնկալվում է, որ ֆորումին կմասնակցի մոտ 50 ընկերություն և ավելի քան 3 հազար այցելու։ Այս տարի միջոցառումը կանցնի մի շարք թեմաներով, որոնց թվում են զբոսաշրջություն, սպասարկում ու առևտուր, գյուղատնտեսություն ու վերամշակում, շինարարություն և լեռնահանքային արդյունաբերություն, ֆինանսաբանկային ոլորտ և էլեկտրոնային կոմերցիա, առողջապահություն, կրթություն, տրանսպորտ։
Ֆորումի կազմակերպիչներն են Ինֆորմացիոն տեխնոլոգիաների ձեռնարկությունների միությունը (UITE) և «ԱրմենՏել» հեռահաղորդակցական ընկերությունը (ապրանքանիշը` Beeline)։ Բիզնես ֆորումն անցկացվում է ՀՀ վարչապետի բարձր հովանու ներքո։ Այս տարի բիզնես ֆորումին որպես հովանավոր միացել են նաև «ARinteg» ռուսական ընկերությունը և հայկական Կոնվերս բանկը։
DigiTec –2014 բիզնես ֆորումի տեղեկատվական հովանավորն է «ԱՌԿԱ» լրատվական գործակալությունը։
Ինֆորմացիոն տեխնոլոգիաների ձեռնարկությունների միությունը (UITE) հիմնադրվել է 2000 թ.–ին`այդ ոլորտի ընկերությունների տնտեսական շահերի պաշտպանության, բիզնեսի զարգացման խթանման, ՏՏ ոլորտի հետազոտությունների խրախուսման նպատակով։–0–
Ծանոթացեք լուրերին առաջինն ու քննարկեք դրանք մեր Telegram-ում
18:26 17.06.2014