«Idram» ընկերությունը «Բջջային դրամապանակ» ծառայության համար դեմո–հոլովակների մրցույթ է հայտարարել

ԵՐԵՎԱՆ, 6 հունիսի. /ԱՌԿԱ/. «Idram» վճարային համակարգի օպերատորը «Բջջային դրամապանակ» ծառայության համար գովազդային դեմո–տեսանյութերի ստեղծման մրցույթ է հայտարարել, հինգշաբթի ասուլիսի ժամանակ տեղեկացրեց «Idram» ընկերության հասարակայնության հետ կապերի պատասխանատու Տաթև Մադաթյանը։

Մրցույթին կարող են մասնակցել երիտասարդ ռեժիսորներ, օպերատորներ, լրագրողներ։ Մրցույթը կանցկացվի երկու փուլով։ Առաջին փուլում հաղթողներին ընտրելու է պրոֆեսիոնալ ժյուրին, որի կազմում կլինեն Երևանի թատրոնի և կինոյի պետական ինստիտուտի և «ՕՐԴՖԻԼՄ» կինոընկերության լավագույն մասնագետները: Երկրորդ փուլում ժյուրիի կողմից լավագույնը ճանաչված աշխատանքները կդրվեն Facebook- ում բաց քվեարկության։

Մրցույթի երկու փուլերի արդյունքներով լավագույնը ճանաչված հոլովակի հեղինակը ԻԴՐԱՄ-ի գործընկեր «Մոբայլ սենթր»-ի կողմից որպես
մրցանակ կստանա Sumsung Galaxy Ace S5830 հեռախոս և ԻԴՐԱՄ հաշվի լիցքավորում: Լավագույն հոլովակի հեղինակը պրոդյուսերական աջակցություն կստանա ՕՐԴՖԻԼՄ կինոընկերության կողմից: 2–5–րդ տեղերը զբաղեցրած մասնակիցները նույնպես կներգրավվեն կինոընկերության տարբեր նախագծերում, բացի այդ, կհամալրվի նրանց Idram հաշիվը։

Հոլովակները հարկավոր է տեղադրել YouTube-ում և ուղարկել [email protected] հասցեին: Վերջնաժամկետը հունիսի 30-ն է:

«Idram»-ի գործունեությունն ուղղված է Ինտերնետ միջավայրում դրամական փոխանցումների իրականացման և ծառայությունների վճարման հնարավորությունների զարգացմանը։ -0-

Ծանոթացեք լուրերին առաջինն ու քննարկեք դրանք մեր Telegram-ում

15:33 06.06.2013