Intel–ը սառեցրել է նոր սերնդի պրոցեսորների` 5 մլրդ դոլար արժեք ունեցող գործարանը
ԵՐԵՎԱՆ, 15 հունվարի. /ԱՌԿԱ/. Անհատական համակարգիչների պահանջարկի նվազման պատճառով Intel–ը սառեցրել է Արիզոնա նահանգի Չանդլեր քաղաքում տեղակայված 14–նմ տոպոլոգիայով պրոցեսորների գործարանի շինարարությունը։ Այդ մասին հայտնում է Reuters–ը` հղում անելով Intel–ի ներկայացուցիչ Չակ Մալոյին (Chuck Mulloy)։ Այդ գործարանում կորպորացիան պատրաստվում էր 2013 թվականի վերջից չիպերի արտադրություն սկսել։
Fab 42 գործարանը պետք է դառնար Intel–ի` ճյուղում ամենափոքր տրանզիստորներով միկրոսխեմաների թողարկման ժամանակակից արտադրական հարթակ, գրում է cnews.ru–ն։
Նոր գործարանը ծանուցելիս` Intel–ում հայտարարեցին, որ կառուցման կապիտալ ծախսերի ծավալը կկազմի 5 մլրդ դոլար։ ԱՄՆ նախագահ Բարաք Օբաման (Barack Obama) իր խոսքում Fab 42–ը նշում էր որպես ամերիկյան արդյունաբերության ներուժի օրինակ։
Fab 42–ն ընդգրկված էր այն վայրերի ցուցակում, որի այցելությունը ծրագրվել է Բարաք Օբամայի կողմից 2012 թվականի նրա նախընտրական քարոզարշավի ընթացքում։ Այցելելով շինարարության վայրը` նա հայտարարել էր, որ նման նախագծերը թույլ կտան ԱՄՆ վերադարձնել միկրոսխեմաների արտադրության բազմաթիվ պայմանագրեր, որոնք վերցրել էին ասիական խոշոր մատակարարողները։
Թե երբ Fab 42–ը կգործարկվի, հայտնի չէ։ Մալոյը նշել է, որ «տեսանելի ապագայում» գործարանը չի աշխատի։ Նա պատմել է, որ ներկա պահին կառուցվել են շենքերը, ստեղծվել է անհրաժեշտ ենթակառուցվածքը, անցկացվել են հաղորդակցությունները, ներառյալ` ջեռուցման և օդափոխման համակարգերը։ Բայց արտադրամասերում չիպերի արտադրության համար սարքավորումը բացակայում է։ -0-
Ծանոթացեք լուրերին առաջինն ու քննարկեք դրանք մեր Telegram-ում
19:37 15.01.2014