Microsoft-ն այլևս չի օգտագործի Nokia ապրանքանիշը
ԵՐԵՎԱՆ, 21 հոկտեմբերի. /ԱՌԿԱ/. Microsoft-ը շուտով կհայտարարի, որ հրաժարվում է Nokia ապրանքանիշից: Այս մասին հաղորդում է The Verge-ը՝ հղում անելով ընկերության աղբյուրներին: Վերաապրանքանիշավորումը կսկսվի Microsoft-ի ֆրանսիական ստորաբաժանումից, որի հաշիվները սոցցանցերում կվերանվանվեն Microsoft Lumia, հաղորդում է iguides.ru-ն:
Վերջին մի քանի ամսում Microsoft-ն աստիճանաբար բջջային հավելվածների վերաապրանքանիշավորում էր անցկացնում, անվանումներից հանվում էր Nokia բառը: Nokia.com կայքը շատ երկրներում հիմա վերահասցեավորված է Microsoft կայքին: Ակնհայտ է, որ սմարթֆոնների նոր մոդելների վրա ևս Nokia ապրանքանիշ այլևս չի նշվի, նրա փոխարեն կգրվի Microsoft կամ Lumia:
Nokia-ն` որպես ապրանքանիշ, չի անհետանա, այն կօգտագործի ֆիննական ընկերությունը, որը Microsoft-ին էր վաճառել իր շարժական բիզնեսը, իսկ հիմա զբաղվում է HERE քարտեզագրական ծառայության, կորպորատիվ հատվածի համար նախատեսված ցանցային տեխնոլոգիաների զարգացմամբ, ինչպես նաև մշակում և արտոնագրում է նորարարական տեխնոլոգիաներ էլեկտրոնային հաղորդակցությունների ոլորտում:-0-
Ծանոթացեք լուրերին առաջինն ու քննարկեք դրանք մեր Telegram-ում
19:17 21.10.2014