Motorola–ի տնօրենը կանխատեսում է Samsung–ի մոտալուտ տապալումը

ԵՐԵՎԱՆ, 9 փետրվարի. /ԱՌԿԱ/. Forbes ամսագրում հրապարակված հարցազրույցում Motorola–ի ղեկավար Ռիկ Օստերլոխը ներկայացրել է շարժական բիզնեսի զարգացման օրինաչափությունները և կանխատեսել է, որ Samsung–ն առաջիկայում կզիջի առաջատարի դիրքերը։ Օստերլոխի կարծիքով` շարժական շուկայի փոփոխականությունն ու շուկայի ներսում մղվող մշտական թեժ պայքարը հանգեցնում են 7 տարին մեկ անգամ առաջատարի պարբերական փոփոխության, հաղորդում է iguides.ru–ն։

Ներկայացնելով Nokia–ի և Blackberry–ի օրինակները, որոնք զրկվել են «առաջատարի գահից», նա նման ճակատագիր է կանխատեսում նաև Samsung–ի դեպքում։ Կորեական հսկայի տապալումը Օստերլոխը դիտարկում է որպես սեփական ընկերության դիրքերը զգալիորեն ամրապնդելու հնարավորություն։ Նման լավատեսությունը չի կարելի համարել միայն գովազդային քայլ։

Նախորդ տարվա ցուցանիշների ցույց տվեցին, որ 2013թ.–ի նույն ժամանակահատվածի համեմատ` ավելի քան 100 տոկոսանոց շարունակական դինամիկա է գրանցվել վաճառքի ծավալներում։ Motorola–ն դուրս է գալիս լճացումից և ակտիվորեն փորձում է վերադարձնել կորցրած շուկաները։

Ապագա հաջողությանն ուղղված էական քայլ կարելի է համարել նաև Չինաստանում ընկերության դիրքերի ամրապնդումը։ Իսկ Samsung–ը, հակառակը, այդքան էլ լավ ժամանակներ չի ապրում։ Անցնող տարվա արդյունքում այսօրվա առաջատարը արտադրանքի պահանջարկի անկում և շահույթի նվազում է գրանցել, ինչի հետևանքով փակվել է Լոնդոնի գլխավոր խանութը, ինչպես նաև աշխատանքից հեռացվել են մի շարք ղեկավարներ։–0–

Ծանոթացեք լուրերին առաջինն ու քննարկեք դրանք մեր Telegram-ում

13:23 09.02.2015