Nokia–ն իրեն ավելի լավ է զգում առանց սմարթֆոնների
ԵՐԵՎԱՆ, 2 փետրվարի. /ԱՌԿԱ/. Nokia ընկերությունը լավ արդյունքներ է գրանցել 2014թ.–ի IV եռամսյակի արդյունքում։ Ֆիննական հեռահաղորդակցական ընկերության զուտ շահույթը աճել է 12 տոկոսով` հասնելով 356 մլն եվրոյի։ Ինչպես երևում է, ընկերությունն իրեն վատ չի զգում առանց սմարթֆոնների, գրում է Vestifinance.ru–ն։
Մեկ տարի առաջ Nokia–ի զուտ շահույթի ցուցանիշը կազմել է 317 մլն եվրո։ Հաշվետու ժամանակահատվածում Nokia–ի հասույթն ավելացել է 9 տոկոսով` 3,4 մլրդ եվրոյից հասնելով 3,8 մլրդ եվրոյի։ Օպերացիոն շահույթն ավելացել է 28 տոկոսով` հասնելով 524 մլն եվրոյի, նշվում է ընկերության հաշվետվության մեջ։
Նախորդ տարվա ապրիլին Nokia–ն ավարտել է Microsoft–ի գործարքը, որը վերաբերում էր բջջային ստորաբաժանման վաճառքին։ Ըստ պայմանագրի` Nokia–ին արգելվում է կրկին դուրս գալ սմարթֆոնների շուկա, սակայն Nokia–ն, կարծես, դրան չի էլ ձգտում։ Ընկերությունում խաղադրույք են կատարում պլանշետների վրա։
Հունվարի 7–ին վաճառքի է հանվել Nokia N1 պլանշետը, որի առաջին խմբաքանակը (20 հազար օրինակ) վաճառվել է 4 րոպեում։
Պլանշետների հաջորդ խմբաքանակները վաճառքի են հանվել հունվարի 15–ին և 22–ին, դրանք ևս վաճառվել են ինտերնետ–խանութներում հաշված րոպեներում։
Պլանշետների չորրորդ խմբաքանակին հարկավոր է սպասել մինչև փետրվարի 26–ին, սակայն այդ հարցում արդեն մեղավոր է չինական Նոր տարին։ Nokia N1 պլանշետը Չինաստանում արժե 256 դոլար, այն զինված է 7,9 դյույմանոց IPS–էկրանով (Retina–ի նման) և 2,3 ԳԳհ հզորությամբ Intel Atom Z3580 չորս միջուկանոց պրոցեսորով, որը գործում է Android օպերացիոն համակարգով։
Ընկերությունը հիմնական գումարներն ամեն դեպքում աշխատում է բջջային կապի օպերատորների և քարտագրական ծառայությունների համար նախատեսված հեռահաղորդակցական սարքավորումների վաճառքի արդյունքում։ Վերջին դեպքում գումարները ստացվում են հիմնականում բիզնես–հաճախորդներից, ծրագրային արտոնագրումից (այդ թվում նաև Microsoft–ից) և Android–ի համար նախատեսված հավելվածներից։
Սակայն պլանշետների թողարկման բիզնեսը ևս զարգացման լավ հեռանկարներ ունի։
Nokia–ում համոզված են, որ մի քանի տարում ընկերությունը կրկին կարող է աճ գրանցել։ Այն նախատեսում է ընդլայնել իր պլանշետների քանակն ու որակը, որպեսզի հետագայում դրանց օգնությամբ վերագործարկի նաև ընկերության մնացած ուղղությունները։ Այս պահին փողերի մեծ մասը Nokia–ն ստանում է 4G սարքավորումների վաճառքից, սակայն արդեն տարեվերջին իրավիճակը կարող է փոխվել։–0–
Ծանոթացեք լուրերին առաջինն ու քննարկեք դրանք մեր Telegram-ում
13:12 02.02.2015