Բիզնես-նորարարությունների միջազգային երկրորդ ֆորումն ուղղված է Հայաստանի նորարարական վարկանիշի քննարկմանը
ԵՐԵՎԱՆ, 29 հոկտեմբերի. /ԱՌԿԱ/. Բիզնես–նորարարությունների միջազգային երկրորդ ֆորումի ընթացքում կքննարկվի Հայաստանի նորարարական վարկանիշը, հայտարարեց Ինֆորմացիոն տեխնոլոգիաների ձեռնարկությունների միության (UITE) տնօրեն Կարեն Վարդանյանը։
«Տեխնոլոգիական կրթության և ձեռնարկատիրության ոլորտը Հայաստանում լուրջ փոփոխությունների կարիք ունի, որոնք կարող են կատարվել հատուկ ծրագրերի իրագործման ընթացքում։ Ֆորումի առաջին օրը կլինի «Ինչու՞ Հայաստանը» վերնագրով շնորհանդես բոլոր նորարարական ընկերությունների համար»,– չորեքշաբթի մամուլի ասուլիսում ասաց Վարդանյանը։
Ըստ նրա` անհրաժեշտ է նաև կողմնորոշվել, թե Հայաստանը ՏՏ ոլորտի ծառայություններ մատուցո՞ղ երկիր է, թե՞ պրոդուկտներ ստեղծող երկիր։ Վարդանյանը նշեց նաև, որ բարձր տեխնոլոգիաների ոլորտի հեղինակավոր ներկայացուցիչներից մեկը ֆորումում կդառնա Իսրայելի վենչուրային արդյունաբերության հիմնադիր Իգալ Էրլիխը, ով կներկայացնի այդ երկրում նորարարական զարգացման փորձը։
Բիզնես–նորարարությունների միջազգային երկրորդ ֆորումը կանցկացվի հոկտեմբերի 31–ից նոյեմբերի 1–ը Դիլիջան քաղաքում։ Այս տարի ֆորումը նվիրված է Հայաստանի տեխնոլոգիական կրթության և տեխնոլոգիական բիզնեսի զարգացմանը։
«Մեզ համար շատ կարևոր են այսպիսի միջոցառումները, քանի որ մեր ընկերությունը հպարտությամբ ներկայացնում է Հայաստանը բազմաթիվ ցուցահանդեսներում։ Նմանատիպ միջոցառումների անցկացումը նպաստում է Հայաստանի ներկայացմանը որպես մի երկրի, որը որակյալ պրոդուկտներ է արտադրում ՏՏ ոլորտում»,– ասաց միջոցառման գլխավոր հովանավոր «Բեթ Կոնստրակտ» ընկերության ներքին զարգացման հարցերով փոխնախագահ Արմինե Մկրտչյանը։
Ըստ նրա` Հայաստանի ՏՏ ոլորտի զարգացման հիմնական խնդիրն այսօր կրթությունն է, ինչպես նաև լավ մասնագետների պակասը։
Հայաստանում Ռոսսոտրուդնիչեստվոյի ներկայացուցչության ղեկավար Մարկ Կալինինն իր հերթին հայտնեց, որ ֆորումը շատ կարևոր հարթակ է, որում երկու երկրների ձեռնարկատերերն ու գործարարները կարող են նորարարական գաղափարներ և նախագծեր քննարկել։
«Այդ ֆորումի կարգախոսն է` մինչև 2018 թվականը Հայաստանը պետք է ընդգրկվի աշխարհի առավել նորարարական երկրների քսանյակում։ Դա համընկնում է Ռուսաստանի` այդ ցուցակում լինելու ցանկության հետ։ Ֆորումի շրջանակում ծրագրված են բանավեճեր և կլոր սեղաններ նորարարության բնագավառում միջազգային փորձի և Հայաստանի փորձի համեմատության համար»,– ասաց Կալինինը։
Ռոսսոտրուդնիչեստվոյի ներկայացուցչության ղեկավարն ասաց, որ ծրագրում նախատեսված է նաև տեղեկատվական–հեռահաղորդակցային տեխնոլոգիաների օգտագործման քննարկումը համալսարանական և դպրոցական կրթության բնագավառում։
Ֆորումը կանցկացվի Հայաստանի վարչապետի մասնակցությամբ և բարձր հովանու ներքո` Հայաստանի արդյունաբերողների և գործարարների միության, «Ռոսսոտրուդնիչեստվոյի» և այլ ընկերությունների օժանդակությամբ։
Բիզնես–նորարարությունների առաջին միջազգային ֆորումը նույնպես անցկացվել է Դիլիջանում 2013 թվականի նոյեմբերի 29–ից դեկտեմբերի 1–ը։ -0-
Ծանոթացեք լուրերին առաջինն ու քննարկեք դրանք մեր Telegram-ում
18:40 29.10.2014