Orange–ի հեռանալով Հայաստանը կկորցնի եվրոպական ավանդույթներով խաղացողի. մեդիափորձագետ
ԵՐԵՎԱՆ, հուլիսի 23. /ԱՌԿԱ/. Orange ընկերության հեռանալով Հայաստանից հեռանում է եվրոպական ավանդույթներով խաղացողը, «ԱՌԿԱ» գործակալությանն ասաց տեղեկատվական անվտանգության փորձագետ Սամվել Մարտիրոսյանը` մեկնաբանելով Ucom ընկերությանը «Orange Արմենիայի» բաժնետոմսերի ամբողջական փաթեթի վաճառքի մասին բանակցությունները։
«Orange Արմենիայի» գլխավոր տնօրեն Ֆրանսիս Ժելիտբերը չորեքշաբթի հայտարարեց, որ Orange խումբը բանակցություններ է վարում Ucom–ի հետ` Orange Արմենիայի բաժնետոմսերի 100 տոկոսի վաճառքի մասին։
«Այստեղ կան բացասական կողմեր։ Խաղացողների թվի նվազումն արդեն մինուս է։ Հեռանում է նաև եվրոպական ավանդույթներով խաղացող, որը մեզ չէր խանգարի, քանի որ հաղորդակցությունների ոլորտում այժմ կգերիշխի հետխորհրդարային մենեջմենթը` ռուսական և հայկական»,– նշեց Մարտիրոսյանը։
Մյուս կողմից, նրա խոսքով, վերջին ժամանակներն ակնհայտ է, որ Orange–ը չի դիմանում մրցակցությանը։
«Հնարավոր է` դա կապված էր ընկերության նոր տնօրենի հետ, ով ակնհայտորեն զիջում էր նախկին ղեկավարությանը, որը սկզբից առաջ է մղել Հայաստանում ընկերությունը։ Երիտասարդ բաժանորդների, կորպորատիվ բաժանորդների վրա շեշտադրումը չօգնեց։ Մինուս էր Հայաստանում թույլ ծածկույթը` մնացած օպերատորների համեմատ։ Լեռնային լանդշաֆտով Հայաստանի համար դա էական գործոն է»,– ասաց Մարտիրոսյանը։
Նա նշեց, որ ապագայում Ucom և Orange ընկերությունների ձուլումը կարող է խնդիր դառնալ Beeline–ի համար, քանի որ վերջինն առանց այդ էլ կորցնում է դիրքերն այն ոլորտում, որտեղ ուժեղագույնն է եղել` ինտերնետ կապի տրամադրման ոլորտում։
«Ucom–ը և Orange–ը միասին արդեն ակնհայտ մրցակից են բաժանորդների քանակի առումով։ «Ռոստելեկոմի» համար դա կարող է խնդիր դառնալ, քանի որ հենց Ucom–ը և Ռոստելեկոմը հիմա առավել դինամիկ աճող ընկերություններն են ինտերնետ կապի ոլորտում»,– ասաց փորձագետը։
Մարտիրոսյանը կարծում է, որ Ucom–ը միաժամանակ առավելություն է ստանում բաժանորդների քանակով և տրամադրվող կապի տեսակներով։
«Հուսով եմ, որ միջավայրը կշարունակի մրցակցային մնալ։ Բացի այդ, լուրեր են պտտվում, որ Ucom–ը Orange Արմենիան գնելուց հետո պատրաստվում է վաճառել իրեն ռուսական Մեգաֆոնին, դրանք միայն լուրեր են։ Քանի որ հակառակ դեպքում հեռահաղորդակցությունների հայկական ոլորտն ամբողջությամբ կանցնի ռուսական գերիշխանության տակ»,– ասաց Մարտիրոսյանը։
Միաժամանակ, փորձագետը դժվարացավ գնահատական տալ գալիք վաճառքի գործարքի գումարին, քանի որ Հայաստանում շուկան այս ոլորտում օրինաչափություններ չունի։
«Ինչ վերաբերում է նրան, թե ուր և ինչու է հեռանում Orange–ը, ապա դատելով հաղորդագրություններից` ընկերությունը կպահպանի ապրանքանիշը մեկ տարի։ Կփոխվի բաժնետերը` France Telecom–ից ակտիվները կանցնեն Ucom–ին։ Կարծում եմ, որ մեկ տարի անց Orange–ը` որպես բրենդ, կդադարի գոյություն ունենալ»,– հավելեց նա։
Orange Armenia–ն France Telecom (ապրանքանիշը` Orange) ընկերության 100 տոկոսանոց դուստր ընկերությունն է, որը հայկական շուկա է մտել 2009թ.–ի նոյեմբերի 5–ին։ Այն ապահովում է ցանցի 83 տոկոսանոց ծածկույթ և բջջային ցանցի և ինտերնետ հասանելիություն հանրապետության 600 համայնքներում (քաղաքներում և գյուղերում)։
Ucom (Universal Communications) ընկերությունը հիմնադրվել է 2007 թ.–ին և զբաղվում է հեռահաղորդակցական ծառայությունների տրամադրմամբ։ Ericsson–ի աջակցությամբ ընկերությունը ստեղծել է լայնաշերտ հասանելիության ցանց` տրամադրելով ինտերնետային, IP հեռուստատեսության և ֆիքսված հեռախոսակապի ծառայություններ։-0-
Ծանոթացեք լուրերին առաջինն ու քննարկեք դրանք մեր Telegram-ում
20:15 23.07.2015