Առաջին անգամ պատմության մեջ կրճատվել է պլանշետների շուկան
ԵՐԵՎԱՆ, 3 փետրվարի. /ԱՌԿԱ/. 2014 թվականի 4–րդ եռամսյակում պլանշետների մատակարարումները համաշխարհային շուկա կազմել են 76.1 մլն հատ, ինչը 3.2 տոկոսով պակաս է 2013 թվականի նույն ժամանակահատվածի համեմատ։ Դա 2010 թվականին սկիզբ առած շուկայի պատմության մեջ առաջին կրճատումն է, նախնական տվյալներն է հայտնում IDC–ն։
2014 թվականի առաջին երեք եռամսյակներում շուկան դրական դինամիկա էր ցուցադրում։ Եվ, ընդհանուր առմամբ, նախորդ տարի այն աճել է 4.4 տոկոսով` մինչև 229.6 մլն սարք, հայտնել են վերլուծաբանները։ 2013 թվականին շուկայի ծավալը կազմել է 219.9 մլն պլանշետ, հայտնում է cnews.ru–ն։
2014 թվականի 4–րդ եռամսյակի բացասական դինամիկան վերլուծաբանները կապել են Apple iPhone–ի վերջին սերնդի պլանշետների էկրանների անկյունագծերի մեծացման հետ։ Այդ պատճառով նվազել են iPad–ի վաճառքները (4–րդ եռամսյակի կրճատումը կազմել է 17,8%)։ Apple iPad–ը շուկայի հիմնական դրայվերներից է, այդ իսկ պատճառով շուկայի դինամիկան կախված է այդ պլանշետների վաճառքներից, նշել են IDC (iPad–ին բաժին է ընկնում 4–րդ եռամսյակի բոլոր մատակարարումների 28.1 տոկոսը)։
Պլանշետների համաշխարհային շուկայի մեկ այլ դրայվեր էլ Samsung ընկերության Galaxy Tab պլանշետների շարքն է։ Դրանց մատակարարումը 4–րդ եռամսյակում կրճատվել է 18.4 տոկոսով։
4–րդ եռամսյակում բացասական դինամիկա են դրսևորել նաև Asustek–ի (նվազումը` 24,9%) և Amazon–ի (69,9%–ով) ցուցանիշները։ Asustek–ն արդյունքում երրորդից իջել է հինգերորդ տեղ, երրորդը զբաղեցրել է Lenovo–ն, դրա մատակարարումներն ավելացել են 9,1%–ով։
Վերլուծաբանները չեն փոխել 2015 թվականի կանխատեսումը։ Նրանք համոզված են, որ այս տարի պլանշետների շուկան կաճի։ Նրանց կարծիքով` դրական դեր կխաղան` Windows 10–ի թողարկումը, պրոֆեսիոնալ նպատակներով մոդելների տարածումը, էկրանի անկյունագծի մեծացումը։ 2015 թվականի ենթադրվող աճի կոնկրետ թվեր փորձագետները չեն հայտնել։ -0-
Ծանոթացեք լուրերին առաջինն ու քննարկեք դրանք մեր Telegram-ում
13:26 03.02.2015