«ԱրմենՏել» ընկերության գլխավոր տնօրենը մեկնաբանել է Orange Արմենիան Ucom–ին վաճառելու շուրջ ընթացող բանակցությունները
ԵՐԵՎԱՆ, 23 հուլիսի. /ԱՌԿԱ/. Հայաստանում Beeline ընկերության գլխավոր տնօրեն Անդրեյ Պյատախինը Facebook սոցցանցի իր էջում մեկնաբանել է Orange Արմենիայի ընկերության շուրջ ստեղծված իրավիճակը` հույս հայտնելով, որ վերջին իրադարձությունները դրական փոփոխությունների կհանգեցնեն։
Չորեքշաբթի Orange Արմենիա ընկերության գլխավոր տնօրեն Ֆրանսիս Ժելիբտերը լրագրողներին տեղեկացրել է, որ Orange խումբը բանակցություններ է վարում Ucom ընկերության հետ Orange Արմենիա ընկերության բաժնետոմսերի 100 տոկոսի վաճառքի շուրջ։
«Ամեն դեպքում կցանկանայի հավատալ, որ վերջին իրադարձությունները կհանգեցնեն միայն դրական փոփոխությունների և բաժանորդների համար նոր կոնվերգենտային սակագնային առաջարկների», – նշել է Պյատախինը։
Նրա խոսքով` ստեղծված իրավիճակում կարող են հնարավորություններ ստեղծվել Beeline–ի համար, որոնք ընկերությունը կօգտագործի։
«Մենք կշարունակենք աշխատել նույն տեմպով և անել հնարավորը` յուրաքանչյուր հաճախորդի պահանջմունքներն առավելագույնս բավարարելու համար։ Իսկ ինչ կլինի հետագայում, ցույց կտա ժամանակը», – ավելացրել է Պյատախինը։
Հայաստանում Beeline–ի ղեկավարը նաև նշել է, որ ընկերությունը պատրաստ է նոր ղեկավարության հետ ևս քննարկել ցանցային ռեսուրսների համատեղ օգտագործման նախագծերը` ենթակառուցվածքի շինարարության և սպասարկման ինքնարժեքի նվազեցման, ինչպես նաև բաժանորդներին տրամադրվող ծառայությունների որակի բարձրացման նպատակով։
«Մենք միանշանակ ողջունում ենք մրցակցության զարգացումը։ Դրանից շահում են բաժանորդները։ Իսկ վերջին տարիների փորձը ցույց է տվել, որ մենք կարողանում ենք մրցել, և դա անում ենք հաջողությամբ», – նշել է Պյատախինը։
Orange Armenia–ն France Telecom (ապրանքանիշը` Orange) ընկերության 100 տոկոսանոց դուստր ընկերությունն է, որը հայկական շուկա է մտել 2009թ.–ի նոյեմբերի 5–ին։ Այն ապահովում է ցանցի 83 տոկոսանոց ծածկույթ և բջջային ցանցի և ինտերնետ հասանելիություն հանրապետության 600 համայնքներում (քաղաքներում և գյուղերում)։
Ucom (Universal Communications) ընկերությունը հիմնադրվել է 2007 թ.–ին և զբաղվում է հեռահաղորդակցական ծառայությունների տրամադրմամբ։ Ericsson–ի աջակցությամբ ընկերությունը ստեղծել է լայնաշերտ հասանելիության ցանց` տրամադրելով ինտերնետային, IP հեռուստատեսության և ֆիքսված հեռախոսակապի ծառայություններ։
«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ։–0–
Ծանոթացեք լուրերին առաջինն ու քննարկեք դրանք մեր Telegram-ում
11:51 23.07.2015