Կողոպտել են Samsung-ի գործարանը. գողացել են 36 մլն դոլարի ավելի քան 40 հազար սմարթֆոն, պլանշետ և նոութբուք
ԵՐԵՎԱՆ, 8 հուլիսի. /ԱՌԿԱ/. Քսան զինված հանցագործներ ավելի քան 40 հազար սմարթֆոն, պլանշետ և նոութբուք են գողացել Samsung Electronics–ի` Սան Պաուլուի գործարանից, որոնց ընդհանուր արժեքը, ոստիկանության գնահատականով, կազմում է մոտ 36 մլն դոլար, հայտնում է Cnews–ը` հղում անելով Reuters–ին։
Գործակալությունը գրում է, որ ամբողջ օպերացիան ֆիլմ է հիշեցրել, իսկ ոստիկանական հաշվետվությունն էլ շատ նման է մարտաֆիլմի սցենարի։
Երեկ երեկոյան յոթ հանցագործներ արգելափակել են ութ ուղևորի տանող ավտոբուսի ճանապարհը, որը նախատեսված էր գործարանի աշխատակիցներին տեղափոխելու համար։ Իրենց հետ վերցնելով նրանցից երկուսին և օգտագործելով նրանց էլեկտրոնային անցագրերը` հանցագործները թափանցել են գործարանի տարածք, զինաթափել և կապի միջոցներից զրկել անվտանգության աշխատակիցներին։
Այնուհետև կողոպտիչները կապի միջոցներից են զրկել այդ պահին գործարանում ներկա բոլոր աշխատակիցներին (մոտ 100 մարդ)։ Աշխատողները շարունակել են աշխատել, այն դեպքում, որ կողոպտիչներն իրենց գործն են արել։
Երբ յոթ կողոպտիչները անձնակազմին մեկուսացրել են արտաքին աշխարհից, խմբի մյուս 13 մասնակիցները գործարանի տարածք են բերել յոթ առևանգված բեռնատարները և, օգտագործելով հաստիքային բեռնիչները, բեռնել են ապրանքը պահեստներից։ Ամբողջ օպերացիան անցել է գիշերը և մոտ 4 ժամ է տևել։
Այժմ ոստիկանությունը զբաղվում է միջադեպի հետաքննությամբ, բայց առայժմ որևէ կասկածյալ չկա։ Ենթադրվում է, որ հետաքննությանը կօգնեն տեսախցիկները, որոնք հանցագործները չէին անջատել։ Թեև նրանց ճանաչելը բարդ կլինի, քանի որ ավազակները դիմակներով են եղել։
Samsung–ի ներկայացուցիչը պարզաբանել է, որ վնասի չափը ոստիկանների նշածից պակաս է, բայց կոնկրետ թիվ չի նշել։ Նա ավելացրել է, որ միջադեպի հետևանքով ոչ ոք չի տուժել։ «Մենք աշխատում ենք ոստիկանների հետ միջադեպի բոլոր հանգամանքները պարզելու համար»,– ասել է նա։ Ոստիկանությունում կարծում են, որ չարագործներին օգնել է Samsung–ի աշխատողներից մեկը, քանի որ առանց ներսի օգնության գործնականորեն անհնարին է նմանատիպ օպերացիա իրականացնել։
Samsung գործարանը գտնվում է Կամպինասում։ Այստեղ են համաշխարհային ընկերությունների այլ արտադրական հարթակներ, ներառյալ` General Electric, Hewlett Packard и Dell։ Այդ վայրը հաճախ անվանում են «բրազիլական Սիլիկոնային հովիտ»։ -0-
Ծանոթացեք լուրերին առաջինն ու քննարկեք դրանք մեր Telegram-ում
13:46 08.07.2014