Սմարթֆոնների շուկայում ունեցած մասնաբաժնի նվազման դեմ պայքարում Samsung–ը կփոխի մարտավարությունը

ԵՐԵՎԱՆ, 13 մարտի. /ԱՌԿԱ/. Սմարթֆոնների շուկայում ունեցած մասնաբաժնի նվազման դեմ պայքարում Samsung Electronics–ը կփոխի մարտավարությունը, հայտարարել է ընկերության համանախագահ Շին Յոնգ Կյունը, հայտնում է «Նովոստի–Արմենիա» գործակալությունը` հղում անելով ՌԻԱ Նովոստիին։

«Samsung Electronics–ը ջանում է ամրապնդել առաջատարի դիրքը պրեմիում դասի հատվածում և մրցունակությունն ամրապնդելու նպատակով ծրագրում է կրկին փոխել սմարթֆոնների շարքը»,– Շինի խոսքն է ներկայացնում Bloomberg գործակալությունը։

Կորեական ընկերությունը մտադիր է մետաղական կորպուսով ավելի շատ սմարթֆոններ արտադրել, ինչպես նաև ավելի բարակ հեռախոսներ և մեծ թողունակությամբ էկրաններ արտադրել։

Ընկերության գլխավոր մրցակիցներից մեկը Apple կորպորացիան է։ 2014 թվականի չորրորդ եռամսյակի արդյունքների համաձայն` ամերիկացիները Samsung–ին գերազանցել են սմարթֆոնների համաշխարհային շուկայում ունեցած վաճառքի ծավալով։ Gartner ընկերության հետազոտության համաձայն` վաճառվել է 74.8 միլիոն iPhone և 73 միլիոն կորեական սմարթֆոն։

Մեկ տարի առաջ Samsung–ի վաճառքի ծավալը կազմել էր 83 միլիոն սարք` Apple–ի 50.2 միլիոնի դիմաց։ Վաճառքի ծավալի քանակով երրորդ ընկերությունը  Lenovo–ն է, որը 2014 թվականին վաճառել է 24.3 միլիոն սարք։-0-

Ծանոթացեք լուրերին առաջինն ու քննարկեք դրանք մեր Telegram-ում

19:46 13.03.2015