Դարաշրջանի ավարտը. պլազմային հեռուստացույցների շուկայից հեռացավ նաև վերջին խոշոր արտադրողը

ԵՐԵՎԱՆ, 28 հոկտեմբերի. /ԱՌԿԱ/. LG Electronics-ը 2014թ.-ի նոյեմբերի վերջին կդադարի պլազմային հեռուստացույցների արտադրությունը: Ընկերությունն այս մասին տեղեկացրել է ֆինանսական հաշվետվության մեջ, որը ներկայացրել է կարգավորիչ մարմիններին:

Որոշումը պայմանավորված է շուկայական իրողություններով, նշել են ընկերությունից: 2013թ.-ին պլազմային հեռուստացույցների վաճառքից ստացված հասույթը LG-ում կազմել է տարեկան եկամուտի ընդամենը 2,3 տոկոսը:

«Մենք փորձել ենք շարունակել պլազմային հեռուստացույցների արտադրությունն այնքան, որքան հնարավոր էր», - Reuters գործակալությանն է ասել LG-ի ներկայացուցիչ Քեն Հոնգը (Ken Hong): «Չնայած մեր ջանքերին, նման բիզնես այլևս չկա», հաղորդում է cnews.ru-ն:

LG-ն արտադրում էր ոչ միայն պլազմային հեռուստացույցներ, այլ նաև հենց պլազմային պանելներ:

Panasonic և Samsung ընկերությունների հետ միասին LG-ն ներառված է պլազմային հեռուստացույցների և պանելների համաշխարհային շուկայի առաջատարների եռյակում: Այժմ LG-ն նմանատիպ սարքավորումներ արտադրող վերջին խոշոր ընկերությունն է:

Մեկնաբանելով LG-ի հայտարարությունը՝ վերլուծաբանները նշել են, որ որոշումը սպասելի էր: Պլազմային հեռուստացույցները պարտություն կրեցին տեխնոլոգիական տեսակետից՝ զիջելով հեղուկ-բյուրեղային հեռուստացույցներին, որոնց տեխնոլոգիական զարգացման տեմպերը զգալիորեն առաջ անցան «պլազմայից»: Բացի այդ, պլազմային հեռուստացույցների թերությունը էներգիայի ավելի մեծ սպառումն էր ու աշխատանքի ժամանակ ջերմության արտազատումը:

NPD DisplaySearch-ի կանխատեսմամբ՝ 2014թ.-ին համաշխարհային շուկա կմատակարարվի 5,2 մլն պլազմային հեռուստացույց: 2015թ.-ին մատակարարումները կնվազեն ավելի քան 10 անգամ՝ հասնելով 500 հազարի: Փորձագետների կարծիքով՝ 2015թ.-ի վերջին պլազմային տեխնոլոգիան գրեթե կանհետանա շուկայից:

Panasonic ընկերությունը, որը ժամանակին պլազմային հեռուստացույցներ և պանելներ արտադրող խոշորագույն ընկերությունն էր, հայտարարեց այդ բիզնեսից դուրս գալու մասին 2013թ.-ի հոկտեմբերին: Samsung ընկերությունն իր հերթին նման քայլի դիմեց 2014թ.-ի հուլիսին: Panasonic-ը դադարեցրեց արտադրությունը 2014թ.-ի մարտին: Samsung-ը նախատեսում է դադարեցնել արտադրությունը 2014թ.-ի նոյեմբերի վերջին՝ LG-ի հետ միաժամանակ:-0-

Ծանոթացեք լուրերին առաջինն ու քննարկեք դրանք մեր Telegram-ում

17:13 28.10.2014