Siemens–ի զուտ շահույթը 2013-14 թվականներին աճել է 25%–ով
ԵՐԵՎԱՆ, 6 նոյեմբերի. /ԱՌԿԱ/. Siemens AG գերմանական արդյունաբերական կոնցեռնի զուտ շահույթը 2013/2014 ֆինանսական տարվա սեպտեմբերի 30–ին ավարտված 12 ամիսների արդյունքներով, նախորդ ֆինանսական տարվա նույն ցուցանիշի համեմատ, ավելացել է 25 տոկոսով` մինչև 5.5 միլիարդ եվրո, վկայում են ընկերության տվյալները, հաղորդում է ՌԻԱ Նովոստին։
Հաշվետու ժամանակահատվածում մեկ բաժնետոմսին բաժին ընկած շահույթն աճել է մինչև 6.31 եվրո մեկ տարի առաջ գրանցված 5.03 եվրոյից։
Ֆինանսական տարվա չորրորդ եռամսյակի զուտ շահույթն ավելացել է 40.3 տոկոսով` մինչև 1.5 միլիարդ եվրո, վերլուծաբաններն ակնկալում էին, որ ցուցանիշը կկազմի 1.49 միլիարդ եվրո։ Մեկ բաժնետոմսին բաժին ընկած զուտ շահույթը կազմել է 1.71 եվրո` նախորդ ֆինանսական տարվա չորրորդ եռամսյակի 1.18 եվրոյի դիմաց։ Ընկերության հասույթը հաշվետու ժամանակահատվածում աճել է 0.3 տոկոսով և կազմել է 20.62 միլիարդ եվրո։
«Մենք հասել են 2014 ֆինանսական տարվա ծրագրած ցուցանիշներին»,– նշել է Siemens–ի տնօրեն Ջո Կեզերը (Joe Kaeser)։
Ընկերության էներգետիկ հատվածի շահույթն ընթացիկ ֆինանսական տարվա չորրորդ եռամսյակում 2012-2013 ֆինանսական տարվա նույն ժամանակահատվածի համեմատ նվազել է 28.5 տոկոսով` մինչև 403 միլիոն եվրո։
1847 թվականին ստեղծված Siemens AG կոնցեռնն էլեկտրատեխնիկայի, էլեկտրոնիկայի, էներգետիկ սարքավորումների, տրանսպորտի, բժշկական սարքավորումների և լուսատեխնիկայի, ինչպես նաև արդյունաբերության, տրանսպորտի և կապի տարբեր բնագավառների համաշխարհային առաջատարներից է։ Ընկերության կենտրոնակայանները Բեռլինում և Մյունխենում են, աշխատողների թիվը գերազանցում է 400 հազարը։
-0-
Ծանոթացեք լուրերին առաջինն ու քննարկեք դրանք մեր Telegram-ում
18:22 06.11.2014