Sony–ն պատրաստվում է առաջիկա 3 տարում մեծացնել շահույթը
ԵՐԵՎԱՆ, 18 փետրվարի. /ԱՌԿԱ/. Ճապոնական Sony ընկերությունը պատրաստվում է առաջիկա երեք տարում մեծացնել շահույթը, ինչպես նաև մեծացնել բաժնետիրական կապիտալի շահութաբերությունը, հայտնում է Vestifinance.ru–ն։
Sony–ի տարածած հաղորդագրության համաձայն, ընկերությունը մտադիր է հասնել 2017 ֆինանսական տարվա համար նախատեսված գործառնական շահույթի նպատակային ցուցանիշին, որը կազմում է 500 մլրդ իեն ($4,2 մլրդ)։
Ընկերությունը նշում է, որ շահույթի աճի հիմնական շարժիչները կլինեն պատկերների հաղորդիչների, խաղային հավելվածների հետ կապված գործառնությունները, ինչպես նաև` հեռուստատեսային և երաժշտական հեռարձակման ոլորտի ստորաբաժանումները։
2015 թվականին ավարտվող ֆինանսական տարվա ընթացքում Sony–ն մտադիր է 20 մլրդ իեն գործառնական շահույթ ստանալ։ Ընկերությունն ընթացիկ ֆինանսական տարվա կանխատեսումը բարձրացրել էր մեկ ամիս առաք, իսկ ավելի վաղ Sony–ում սպասում էին, որ 40 մլրդ իեն գործառնական վնաս կկրեն։
Sony–ն հույս ունի, որ 2017 թվականին բաժնետիրական կապիտալի շահութաբերության (ROE) ցուցանիշները 10 տոկոսից բարձր կլինեն։ Հաղորդագրության համաձայն, այդ ցուցանիշը ընկերության գործունեության գնահատականի հիմնական ցուցիչը կդառնա։
Վերջին անգամ ROE–ն 10 տոկոսից բարձր է եղել 2008 թվականի մարտին ավարտված ֆինանսական տարում, այդ ժամանակ ցուցանիշը կազմել էր 10.8 տոկոս։-0-
Ծանոթացեք լուրերին առաջինն ու քննարկեք դրանք մեր Telegram-ում
15:11 18.02.2015