Sony-ն կկրճատի իր սմարթֆոնների և հեռուստացույցների թիվը

ԵՐԵՎԱՆ, 26 նոյեմբերի. /ԱՌԿԱ/. Sony–ն մտադիր է կրճատել սմարթֆոնների մոդելային շարքը, ինչի օգնությամբ կնվազեցնի ծախսերը և երեք տարիների ընթացքում բջջային ստորաբաժանումը շահույթ կբերի, հայտնում է Reuters–ը` հղում անելով կորպորացիայի ներկայացուցիչներին։

Ինչպես հայտնում է Cnews–ը, ընկերությունը միաժամանակ համաձայն է, որ վաճառքը նվազի։ Նա սեփական շուկայական բաժնեմասի ավելացման նպատակ չի դնի։ Թե որքանով կկրճատվի մոդելային շարքը, չի հստակեցվում։

«Մենք չենք ընկնում ազդեցության կամ շուկայական բաժնեմասի հետևից։ Մենք ավելի մեծ շահույթ ենք ցանկանում»,– ներդրողների հետ հանդիպմանը հայտարարեց Sony Mobile Communications–ի նոր նախագահ Հիրոկի Տոտոկին (Hiroki Totoki)։  Նա նշանակվել է այդ պաշտոնում նոյեմբերի կեսերին Կունիմասու Սուձուկիի (Kunimasa Suzuki) փոխարեն։

Նմանատիպ քայլեր է ձեռնարկել նաև Samsung–ը։ Ընկերությունը ծրագրում է 2015 թվականին մեկ քառորդով կամ մեկ երրորդով կրճատել սմարթֆոնների մոդելային շարքը։ Ընկերությունը հույս ունի, որ այդպիսով կկարողանա վերաբաշխել արտադրական հզորությունները և մնացած մոդելների թողարկման ծավալների ավելացման հաշվին կկրճատի դրանց գինը։

2012 թվականին նույն քայլերի մասին հայտնել էր HTC ընկերությունը` որոշելով թողարկել ավելի փոքր թվով սմարթֆոններ, բայց դրանք ավելի որակյալ և ֆունկցիոնալ դարձնել։

2014 թվականի սեպտեմբերի 30–ին ավարտված 2014-2015 ֆինանսական տարվա երկրորդ եռամսյակում Sony–ի բջջային ստորաբաժանման հասույթն աճել է 1.2 տոկոսով` մինչև 2.83 մլրդ դոլար, սակայն ընկերությունը ստիպված է եղել դուրս գրել 1.59 մլրդ դոլար, ինչի հետևանքով ստորաբաժանման վնասը կազմել է 1.58 մլրդ դոլար։ Ամբողջ կորպորացիայի վնասը կազմել է 785 մլն դոլար հաշվետու ժամանակահատվածի արդյունքներով։

Բացի սմարթֆոններից, Sony–ն հայտարարել է կրճատել Bravia հեռուստացույցների շարքը։ Ընկերությունում չեն նշում, թե որքան մոդել կմնա արտադրությունում։
-0-

Ծանոթացեք լուրերին առաջինն ու քննարկեք դրանք մեր Telegram-ում

13:55 26.11.2014