Ucom–ը հայկական շուկայում մի շարք նորարարական լուծումներ կառաջարկի համացանցից օգտվողների համար

ԵՐԵՎԱՆ, 17 փետրվարի. /ԱՌԿԱ/. Ucom ընկերության բաժանորդներն առաջիկայում կկարողանան օգտվել ինտերնետի համար նորարարական լուծումներից, ասաց Ucom ընկերության գլխավոր տնօրեն Հայկ Եսայանը։

«Այս տարի մենք կգործարկենք Calix–ի BLM նոր սարքավորումը, որը թույլ է տալիս բաժանորդներին տրամադրել ինտերնետից օգտվելու նոր հնարավորություններ, այդ թվում` ավելի բարձր արագություն», – երեքշաբթի լրագրողներին ասաց Եսայանը։

Նրա կարծիքով` այս պահին ընկերությունում թեստավորվում է նոր Wi-Fi սարքը, ինչի շնորհիվ բնակելի տներում և գրասենյակներում հասանելի կլինի 200–300 Մբ/վ թողունակությամբ ինտերնետ։

Նա նշեց, որ տեխնոլոգիան շուտով արդեն հասանելի կդառնա ընկերության բաժանորդներին, որոնք կկարողանան օգտվել ոչ միայն բարձր արագություն ունեցող ինտերնետից, այլ նաև բարձր HD որակով հեռուստաալիքներ դիտելու հնարավորությունից։

Եսայանը նաև ընդգծեց, որ Calix–ի հետ համագործակցության շրջանակում դեռևս 2014թ.–ից մշակվել է սարքավորման արդիականացման փաթեթ, որը թույլ է տալիս ավելի բարձր մակարդակով սպասարկում ապահովել բաժանորդներին։

Calix ընկերության  գլխավոր փոխնախագահ, միջազգային վաճառքի պատասխանատու Էնդի Լոքարտն իր հերթին նշեց, որ Ucom–ը ժամանակակից ընկերություններից մեկն է, որը միջազգային հարթակում նորագույն ծառայություններ է տրամադրում։

Նորարարական տեխնոլոգիաների ոլորտի համաշխարհային առաջատար Calix ընկերությունը 2014թ.–ին նորարարական ձեռքբերումների համար գլխավոր մրցանակը հանձնել է Ucom ընկերությանը։ Calix ընկերությունը թույլ է տալիս կապի օպերատորներին վերափոխել իրենց ցանցերը լայնաշերտ ինտերնետ ծառայություններ տրամադրելու համար։

Սկզբում Ucom ընկերությունն իր ցանցը կառուցում էր` օգտագործելով Ericsson ընկերության BLM 1500 բազայի հիման վրա հիմնված սարքավորումներն ու T-series ONT–ին։ Calix ընկերության կողմից Ericsson–ի օպտիկամանրաթելային կապի սարքավորումների մասնաբաժնի ձեռքբերումից հետո ընկերությունը սկսեց օգտագործել Calix Е7-20 Ethernet Service Access ավելի արդիականացված համակարգը։

Ucom ընկերությունը (Universal Communications, ունիվերսալ կապ) հիմնադրվել է 2007 թ.–ին և զբաղվում է հեռահաղորդակցական ծառայությունների տրամադրմամբ։  Ericsson–ի աջակցությամբ ընկերությունը ստեղծել է լայնաշերտ հասանելիության ցանց` տրամադրելով ինտերնետային, IP–հեռուստատեսության և ֆիքսված հեռախոսակապի ծառայություններ։–0–

Ծանոթացեք լուրերին առաջինն ու քննարկեք դրանք մեր Telegram-ում

19:03 17.02.2015