ՎիվաՍել-ՄՏՍ-ի աջակցությամբ ականավոր շվեդ վերլուծաբան Կյել Նորդստրյոմը ելույթ կունենա հայաստանյան լսարանի առջև
ԵՐԵՎԱՆ, 14 հունիսի./ԱՌԿԱ/. 2018 թվականի սեպտեմբերի 7-ին Երևանում ելույթ կունենա ականավոր շվեդ տնտեսագետ, գիտական աշխատությունների հեղինակ և բիզնես վերլուծաբան Կյել Նորդստրյոմը։
Նորդստրյոմը հանդես կգա Հայաստանում իր տեսակի մեջ առաջինը հանդիսացող «Business in FAANG style. ապագա առաջնորդների և կազմակերպությունների ռազմավարություն» դասախոսությամբ՝ ինսայթ սեսիայի ձևաչափով։
Միջոցառման գլխավոր գործընկերն է հեռահաղորդակցության առաջատար օպերատոր ՎիվաՍել-ՄՏՍ-ը:
Ինչպես հայտնում է ընկերության մամուլի ծառայությունը, դասախոսությունը կազմակերպվել է Skill.am-ի նախաձեռնությամբ իրականացվող #WTSA («Համաշխարհային թոփ բանախոսները Հայաստանում») նախագծի շրջանակում։
Կյել Նորդստրյոմը երկու անգամ գլխավորել է «The Thinkers 50» համաշխարհային վարկանիշային ցուցակը և համարվում է դարի ամենահայտնի և պարադոքսալ մտածողներից մեկը:
Միջոցառման մասնակիցները կծանոթանան ժամանակակից գործարար միջավայրի մասին պատմող «Funky Business» բեսթսելերի համահեղինակ Կյել Նորդստրյոմի տեսակետներին: Բանախոսը լսարանին կներկայացնի տարիների իր փորձն ու ապագայի առաջնորդների և կազմակերպությունների ռազմավարությանը վերաբերող գաղտնիքներ, մասնավորապես՝ թե ինչպես է կազմակերպական կառուցվածքն ազդում տեխնոլոգիական խոշոր փոփոխությունների վրա՝ փոխելով արժեհամակարգեր:
Նորդստրյոմի խոսքով, հաջողակ են այն կազմակերպությունները, որոնց ռազմավարությունը համապատասխանում է նշված ընկերությունների գործառնական համակարգերի հիմքում ընկած տրամաբանությանը:
Կյել Նորդստրյոմը բիզնես ոլորտի՝ ներկայում ամենապահանջարկված մտածողներից մեկն է։ 1999թ.-ին լույս տեսած «Funky business» համաշխարհային բեսթսելերն անդրադառնում է 21-րդ դարի նոր բիզնես միտումներին: Նորդստրյոմի հետազոտություններն ու խորհրդատվական գործունեությունը կենտրոնացած են միջազգային կորպորացիաների ռազմավարական կառավարման և գլոբալացման գործընթացների վրա:
«Սրընթաց փոփոխությունների ժամանակաշրջանում ձևափոխվում են կազմակերպությունները, մոտեցումներն ու մեթոդները, տարբեր սերունդների՝ կյանքի առաջնահերթություններն ու արժեքները, ինչպես նաև մարդկային հարաբերությունները: Այս ամենից անմասն չի մնում նաև բիզնես ոլորտը. արդյունքում փոխվում են կազմակերպությունների կառուցվածքային ձևերն ու կառավարման ռազմավարությունները»,– նշվում է հաղորդագրությունում։
«FAANG»-ը սահմանում է բիզնես միջավայրի նոր ստանդարտ: Հապավումն առաջացել է ժամանակակից աշխարհում բիզնես գործունեություն իրականացնող ամենաարդյունավետ ընկերություններից մի քանիսի անվանումների առաջին տառերից: Դրանք են «Facebook», «Apple», «Amazon», «Netflix» և «Google» ընկերությունները։
Ինսայթ սեսիայի մասնակցության հայտերն ընդունվում են, և բոլոր հետաքրքրվածները կարող են դիմել՝ այցելելով www.skill.am կայք: Ինսայթ սեսիան անցկացվելու է անգլերենով՝ միաժամանակյա ռուսերեն թարգմանությամբ:
«Funky Business» գրքի հեղինակներն են Կյել Նորդստրյոմն ու Յոնաս Ռիդեստրալը, որոնք 21-րդ դարի իրականությունն անվանում են «ֆանկ դարաշրջան»։ Այս ժամանակաշրջանում հին խաղի կանոններն այլևս չեն գործում։
Գրքի հիմնական եզրահանգումն այն է, որ այս երկու շվեդ տնտեսագետների կողմից իրականացված դիտարկումներն օգնում են ավելի լավ հասկանալ 21-րդ դարի անկայունությունը, ինչպես նաև՝ աշխարհի հետագա զարգացման վեկտորը: Գիրքը կօգնի ավելի արդյունավետ և ճշգրիտ որոշումներ կայացնել։ Չնայած նրան, որ գիրքը գրվել է 19 տարի առաջ, նրանում ամփոփված դիտարկումներն արդիական են նաև այսօր։ Գիրքը թարգմանվել է 33 լեզուներով և շատերն այն համարում են նոր աշխարհի մանիֆեստը:
ՎիվաՍել-ՄՏՍ-ը («ՄՏՍ Հայաստան» ՓԲԸ) Հայաստանում հեռահաղորդակցության առաջատար օպերատորն է, որն ունի ամենահզոր 2G/3.75G/4G ցանցը և տրամադրում է ձայնային և տվյալների փոխանցման ծառայությունների բազմազան տեսականի` Հայաստանի ամբողջ տարածքում: Գործունեության հիմք ընդունելով իր բաժանորդների շահերին լավագույնս ծառայելը, հիմնադրման օրվանից` 2005թ. հուլիսի 1-ից, ՎիվաՍել-ՄՏՍ-ը կարճ ժամանակամիջոցում կարողացել է ստեղծել համահանրապետական ցանց և բաժանորդների մեծ բազա:–0–
Ծանոթացեք լուրերին առաջինն ու քննարկեք դրանք մեր Telegram-ում
17:11 14.06.2018