Լեռնային Ղարաբաղում 4-րդ անգամ «ՏՀՏ լիդերների հանդիպում» համաժողով կկազմակերպվի

ԵՐԵՎԱՆ, 18 ապրիլի. /ԱՌԿԱ/. Ինֆորմացիոն Տեխնոլոգիաների Ձեռնարկությունների Միությունը, նպատակ հետապնդելով խթանել տեխնոլոգիական զարգացումը Լեռնային Ղարաբաղում, արդեն 4-րդ անգամ կազմակերպում է «ՏՀՏ լիդերների հանդիպում» համաժողովը:

Միջոցառումը կկայանա Շուշի քաղաքում ապրիլի 19-20-ը:

Ինչպես նշված է ԻՏՁՄ հաղորդագրության մեջ, այս անգամ համաժողովի օրակարգային հարցերից են Արցախի ներդրումային միջավայրի ու զարգացման հնարավորությունները, տեխնոլոգիական կրթության և աշխատուժի խնդիրները, տեխնոլոգիական ընկերությունների և արտադրական ենթակառուցվածքների համագործակցությունը: Միջոցառման ընթացքում Արցախում արդեն իսկ գործող տեխնոլոգիական ընկերությունները կներկայացնեն իրենց փորձը և կկիսվեն հաջողության պատմությամբ:

Միջոցառմանը կմասնակցեն ՏՀՏ/ԲՏ ոլորտի մի շարք ընկերություններ, ԼՂՀ բիզնեսի ներկայացուցիչներ, ինչպես նաև` ԼՂՀ պետական պաշտոնյաներ:   

«ՏՀՏ լիդերների հանդիպում» համաժողովն առաջին անգամ Լեռնային Ղարաբաղում անցկացվեց 2010 թվականի  հոկտեմբերի 9-10-ը: Այն նվիրված էր Հայաստանում և Արցախում Տեխնոլոգիական Ձեռներեցության Զարգացման խնդիրներին:

Ինֆորմացիոն Տեխնոլոգիաների Ձեռնարկությունների Միության մասին

Ինֆորմացիոն Տեխնոլոգիաների Ձեռնարկությունների Միությունը հիմնադրվել է 2000թ.-in` որպես Հայաստանում գործող տեղեկատվական և հեռահաղորդակցական տեխնոլոգիաների ոլորտի ձեռնարկությունների բիզնես ասոցիացիա: ԻՏՁՄ-ն ստեղծվել է ոլորտի ձեռնարկությունների շահերի պաշտպանության, բիզնեսի խթանման նպատակով:

Իր գործունեության շրջանակում ԻՏՁՄ-ն կազմակերպում է մի շարք միջոցառումներ` ուղղված ՏՀՏ ոլորտի համար բարենպաստ բիզնես միջավայրի ստեղծմանը, այդ թվում` DigiTec Expo ամենամյա ՏՀՏ/ԲՏ միջազգային ցուցահանդեսը, DigiTec բիզնես ֆորումը, ՏՀՏ առաջնորդների հանդիպում-համաժողովը, Բիզնես Ինովացիոն համաժողովը, DigiCamp ամառային տեխնոլոգիական ճամբարը, «Բաց խաղ» համակարգչային և բջջային խաղերի առաջնությունը և Հայաստանում Ռոբոտատեխնիկայի Զարգացման Ծրագիրը (ԱրմՌոբոտիքս): -0-

Ծանոթացեք լուրերին առաջինն ու քննարկեք դրանք մեր Telegram-ում

16:41 18.04.2014