3D տպիչով տպագրված առաջին ավտոմեքենան պատրաստվում է հատել ԱՄՆ–ն

ԵՐԵՎԱՆ, 13 նոյեմբերի. /ԱՌԿԱ/. Kor Ecologic ընկերությունը, որը կոչվել է հիմնադիր Ջիմ Քորի (Jim Kor) անունով, պատրաստում է Urbee ավտոմեքենայի երկրորդ տարբերակը, որի կորպուսը տպագրվել է 3D տպիչի վրա, հաղորդում է CNews–ը։

Երկու տարի անց Քորի որդիներն այդ մեքենայով ավտոարշավ կկազմակերպեն Միացյալ Նահանգների Արևելքից դեպի Արևմուտք։

Urbee 2–ը երկտեղանոց եռանիվ սարք է` հիբրիդային ուժային սարքավորմամբ, որը բաղկացած է էլեկտրաշարժիչից և շարժիչից, որը կարող է աշխատել ինչպես սովորական բենզինով, այնպես էլ` էթանոլով։ Ավտոմեքենան կարող է առաջ շարժվել 112կմ/ժ արագությամբ, առանց ներքին այրման շարժիչի մասնակցության մեքենայի առավելագույն արագությունը կազմում է միայն 64 կմ/ժ։

Այս տրանսպորտային միջոցի հետաքրքիր առանձնահատկությունը թափքն է, որը պատրաստված է Stratsys Fortus 900 mc եռաչափ տպիչով։ Fused Deposition Modeling (FDM) տեխնոլոգիայով ավելի քան 50 պլաստիկե դետալները տպելու համար 2,5 հազար ժամ է պահանջվել։

Անվտանգությունն ավելացնելու համար կոնստրուկցիային ամրացված է մետաղե խողովակավոր հիմնակմախք։ Ավտոմեքենայի քաշն ամեն դեպքում մեծ չէ` մոտ 544 կգ, այն 30 տոկոսով թեթև է նախորդ մոդելից։ Urbee–ի առաջին սերունդը ստեղծվել է 2010 թ.–ին, սակայն նախորդ օրինակն անհաջող էր, քանի որ չափազանց փխրուն և բարդ էր 3D տպիչով պատրաստելու համար։ Նախորդ մեքենան զինված էր ուժգնության 5–րդ աստիճանի շարժիչով, նոր տարբերակի շարժիչի հզորությունը 7 ձիաուժ է։

Ջիմ Քորը, ով ոչ միայն հիմնել է Kor Ecologic–ը, այլև Urbee–ի գլխավոր ստեղծողն է, փորձել է իր մեքենան դարձնել առավելագույն չափ տնտեսող։ Այդ պատճառով ճակատային դիմադրության գործակիցը հաջողվել է իջեցնել մինչև 0,15–ի։ Համեմատության համար նշենք, որ անգամ Volkswagen XL1 հիբրիդը, որը 100 կմ–ի համար ծախսում է 1 լիտր վառելիքից ոչ շատ, ունի 0,189 գործակից։

2015 թ.–ին Քորի որդիները` Քոդին և Թայլերը, պատրաստվում են իրենց շան հետ Urbee 2–ով անցնել 4,6 հազար կմ հեռավորություն, որը բաժանում է Սան Ֆրանցիսկոն Նյու Յորքից։ Անցնելով ԱՄՆ–ի տարածքով` նրանք մտադիր են ծախսել 38 լիտր բենզինից ոչ շատ։ Այդպիսով վառելիքի ծախսը պետք է կազմի 100 կմ–ի համար 1,57 լիտր։

Կարևոր հարց է նաև ավտոմեքենայի անվտանգությունը։ Հարցազրույցներից մեկի ժամանակ Ջիմ Քորը հայտարարել է, որ Urbee 2–ը ստեղծվում է սպորտային մեքենաների նախագծման չափորոշիչներին համապատասխան։

Kor Ecologic–ի եռանիվ հիբրիդի գինը կազմում է մոտ 50 հազար դոլար։ Նախագիծը կյանքի կոչելու համար հեղինակները որոշել են հավաքել 3 մլն դոլար Kickstarter կայքի օգնությամբ։ Այս մեքենայի սերիական տարբերակի գինը, ինչպես նաև շուկայում հայտնվելու ժամկետները դեռ հայտնի չեն։ –0–

Ծանոթացեք լուրերին առաջինն ու քննարկեք դրանք մեր Telegram-ում

13:32 13.11.2013