Յանդեքսը բջջային որոնողական համակարգ է պատրաստում Ֆեյսբուքում տեղեկություն գտնելու համար
ԵՐԵՎԱՆ, 15 հունվարի. /ԱՌԿԱ/. Ռուսական Յանդեքս ընկերությունը բջջային հավելված է մշակում աշխարհի ամենամեծ սոցիալական ցանցում` Ֆեյսբուքում, տեղեկություն փնտրելու համար, գրում է digit.ru–ն` հղում անելով TechCrunch–ին։
Wonder անունը ստացած հավելվածը Ֆեյսբուքից օգտվողին թույլ կտա իմանալ, թե ինչ են արել կամ որտեղ են եղել սոցցանցի իր ընկերները` այդպիսով հեշտացնելով ռեստորանի կամ երաժշտության ընտրությունը։
Հարցը կարող է տրվել ինչպես տեքստային հաղորդագրությամբ այնպես էլ ձայնային հրահանգով։ Օրինակ` «Լոս Անջելեսի այն ռեստորանները, որտեղ եղել են իմ ընկերները» հարցմանն ի պատասխան ծրագիրը կներկայացնի համապատասխան հղումները։
Յանդեքսի ներկայացուցիչը հրաժարվել է ՌԻԱ Նովոստիին հաստատել Wonder–ը մշակելու փաստը։
Յանդեքսի նախագիծը կարող է մեծ լսարան հավաքել` հաշվի առնելով Ֆեյսբուքի առաջարկած տեղեկության որոնման ոչ այնքան հարուստ հնարավորությունները։ Սակայն սոցցանցի ընթացիկ քաղաքականության համաձայն, Յանեքսը նախ պետք է այդ տվյալներն օգտագործելու թույլտվություն ստանա։
Ֆեյսբուքի ներկայացուցիչները վստահեցնում են, որ այդպիսով պաշտպանում են օգտատերերի տվյալների մասնավոր լինելու հանգամանքը, սակայն հենց այդ կանոններն անհրաժեշտության դեպքում թույլ են տալիս «փակել թթվածինը» մրցակիցների համար (խոսակցություններ են պտտվում, որ Ֆեյսբուքը սեփական Find Friends Nearby ծառայությունն է պատրաստում)։ Այսպիսով` Wonder–ի հեռանկարը հիմնականում կախված կլինի սոցցանցի ադմինիստրացիայի բարեկամական դիրքորոշումից։
Ավելի վաղ Յանդեքսն ու Ֆեյսբուքը մի քանի գործարք էին կնքել, իսկ նրանց ղեկավարները հանդիպում էին ունեցել նախորդ տարվա գարնանը։-0-
Ծանոթացեք լուրերին առաջինն ու քննարկեք դրանք մեր Telegram-ում
11:23 15.01.2013
