Ստեղծվել է աշխարհում առաջին թափանցիկ հեռախոսը
ԵՐԵՎԱՆ, 1 փետրվարի. /ԱՌԿԱ/. Polytron Technologies ընկերությունը ներկայացրել է աշխարհում առաջին լիովին թափանցիկ սմարթֆոնը, գրում է cnews.ru–ն։
Թափանցիկ սմարթֆոնը հիմնականում պատրաստվել է ապակուց` թափանցիկ և ճկուն էլեկտրոնային բաղադրիչների լայն կիրառմամբ, ունի սենսորային համակարգ։
Սմարթֆոնի կորպուսի վրա մի քանի ոչ թափանցիկ բաղադրիչ կա` մոնտաժային պլատան, SIM քարտի և հիշողության քարտի բնիկները և տեսախցիկը։
Polytron–ը ոչ մի տեղեկություն չի հրապարակել այդ թափանցիկ սմարթֆոնի տեխնիկական լուծումներ, տեղադրված օպերացիոն համակարգի, միկրոսխեմաների և տեսախցիկի հնարավորությունների վերաբերյալ։ Անգամ հայտնի չէ, թե ինչ անուն ունի սմարթֆոնը։
Ըստ TomsHardware–ի հաղորդագրության, Polytron–ի թափանցիկ սմարթֆոնը կցուցադրվի 2013թ.–ին Բարսելոնայում` Mobile World Congress (MWC)–ի ցուցահանդեսի ժամանակ։
Ընկերությունը չի հայտնել նաև, թե այս սմարթֆոնը հետագայում ծառայելու է որպես այլ սմարթֆոնների նախատիպ, թե ոչ։ Սակայն Polytron–ի փոխտնօրեն Սերենա Չենը (Serena Chen) հասկացրել է, որ իր ընկերության մասնակցությամբ ստեղծված թափանցիկ հեռախոսները, ամենայն հավանականությամբ, շուկայում կհայտնվեն 2013թ.–ին։
Հայտնի է, որ թայվանական Polytron Technologies–ի հիմնական բիզնեսը սմարթֆոնների մշակումը չէ, այլ` էլեկտրոնային սարքերի համար նախատեսված դիզայներական ապակու և թափանցիկ տարրերի արտադրությունը։
Այսպիսով, Polytron–ի առաջին թափանցիկ հեռախոսը կարող է ընկերության մարքեթինգային հնարքը դառնալ։ –0–
Ծանոթացեք լուրերին առաջինն ու քննարկեք դրանք մեր Telegram-ում
17:00 01.02.2013