Առաջին հայկական պլանշետների պաշտոնական շնորհանդեսը տեղի կունենա Երևանում փետրվարի 4–ին

ԵՐԵՎԱՆ, 3 փետրվարի. /ԱՌԿԱ/. ArmTab առաջին հայկական պլանշետների պաշտոնական շնորհանդեսը տեղի կունենա Երևանում փետրվարի 4–ին, հաղորդում է Հայաստանի Ինֆորմացիոն տեխնոլոգիաների ձեռնարկությունների միության (UITE) մամուլի ծառայությունը։

Նախատեսվում է, որ շնորհանդեսի արարողությանը ներկա կլինի ՀՀ վարչապետ Տիգրան Սարգսյանը, ինչպես նաև Technology and Science Dynamics Inc.–ի հիմնադիր Վահան Չակարյանը։

Միջոցառմանը ներկա կլինեն Minno Tablet ընկերության նախագահ Էրիկ Ռայենը Eric C. Ryan), ՀՀ կրթության նախարար Արմեն Աշոտյանը, ՀՀ էոնոմիկայի նախարար Վահրամ Ավանեսյանը:

Շնորհանդեսի ընթացքում կներկայացվի հայկական պլանշետների արտադրության հարցում ընկերության գործունեությունն ու նրա հետագա քայլերը։ Նախատեսվում է նաև ներկայացնել 2015 թ.–ից Հայաստանի կրթական համակարգում պլանշետների կիրառման հեռանկարները, «Արաքս» առաջին հայկական օպերացիոն համակարգը, որը կտեղադրվի ArmTab պլանշետներում, ինչպես նաև կրթական հավելվածները, որոնք հասանելի կլինեն ArmTab–ի օգտատերերի համար։

Technology and Science Dynamics Inc.–ը Հայաստանի ազատ տնտեսական գոտում գրանցված առաջին ՏՀՏ  ընկերությունն է։

Technology and Science Dynamics Inc.–ը հիմնադրվել է 2013 թվականի հոկտեմբերի 11-ին և զբաղվում է հայկական առաջին դյուրակիր համակարգիչների՝ պլանշետների արտադրությամբ: Արտադրության շրջանակում արդեն կան անդրոիդ համակարգով փորձնական հավաքված պլանշետ (Armtab) և առաջին հայկական հեռախոս (Armphone): Պլանշետի ծրագրային և սարքային ապահովման դիզայնն իրականացվում է Հայաստանում, իսկ հավաքումը` ԱՄՆ-ում և Հոնկոնգում:

«Technology and Science Dynamics Inc/Armtab Technology» պլանշետ արտադրող ընկերությունը կառավարության որոշմամբ ստացել է գործունեության ծավալման սկզբնական թույլտվություն ազատ տնտեսական գոտում` «ՌԱՕ ՄԱՐՍ» ՓԲԸ–ի տարածքում` 3 տարի ժամկետով։ Նախագծում կատարվող ընդհանուր ներդրումներն առաջիկա 3 տարիներին կկազմեն մոտ 6.7 մլն դոլար։ Համաձայն բիզնես–ծրագրի, ընկերությունը պլանշետներ կհավաքի և ծրագրեր կտեղադրի։ Աշխատանքի առաջին տարում ընկերությունը պատրաստվում է վաճառել 10 հազար պլանշետ, իսկ երկրորդ և երրորդ տարիներին, համապատասխանաբար, 30 և 50 հազար պլանշետ։ Աստիճանաբար Հայաստան կտեղափոխվեն պլանշետների մշակման և արտադրության բոլոր փուլերը։ Ընկերությունում չեն բացառել նաև ստորաբաժանման ստեղծումն ԱՏԳ–ից դուրս` հայկական ներքին շուկայի հետ աշխատելու համար։ --0—

Ծանոթացեք լուրերին առաջինն ու քննարկեք դրանք մեր Telegram-ում

13:14 03.02.2014