ԱՄՆ–ում գիտնականները սմարթֆոնների ինքնավերականգնվող ապակի են ստեղծել
ԵՐԵՎԱՆ, 18 ապրիլի. /ԱՌԿԱ/. Կալիֆոռնիայի համալսարանի գիտնականները սմարթֆոնների համար ապակի են ստեղծել, որն օժտված է ինքնավերականգնման հատկությամբ, հայտնում է New York Post–ը։
Ինչպես նշել է գիտական խմբի ղեկավար Չաո Վանը, ապակին չափազանց կայուն է տարբեր ճեղքերի, քերծվածքների նկատմամբ։
«Մեր ստեղծած ապակին ընդունակ է էլեկտրական հոսանք անցկացնել, այդ իսկ պատճառով դրա օգտագործումը որպես սմարթֆոնների և մոբիլ այլ սարքերի էկրաններ միանգամայն նպատակահարմար է»,– պարզաբանել է նա։
Մասնագետի պնդմամբ, եթե ստեղծած նյութը երկու կես անել, ապա դրանք կարող են ամբողջովին վերականգնվել և միաձուլվել ընդամենը մեկ օրում։ Ապակին նաև շատ առաձգական է և կարող է ձգվել` նախնական չափից 50 անգամ երկարելով։
Չաո Վանը վստահ է, որ նոր ապակին շուկայում կհայտնվի արդեն առաջիկա երեք տարիներին և «կփոխի մեր առօրյան»։
Նյութի հիմքում մոլեկուլյար կապի հատուկ տեսակ է։ Եթե այն վնասվել է, դրա մոլեկուլները ձգում են միմյանց`ամբողջությամբ վերականգնելով մակերևույթը մինչև նախնական վիճակի։ Մասնագետները նշում են, որ իրենց նյութը, բացի սմարթֆոններից, կարելի է օգտագործել նաև ռոբոտների և այլ տեխնիկայի ստեղծման ժամանակ։
Ինչպես նշել են գիտնականները, այսպիսի նյութ ստեղծելու համար նրանց ոգեշնչել է «Իքս Մարդիկ» (X-Men) կոմիքսների հայտնի կերպար Ռոսոմախը, ով օժտված էր վերականգնման ընդունակությամբ և գրեթե անխոցելի էր։ -0-
Ծանոթացեք լուրերին առաջինն ու քննարկեք դրանք մեր Telegram-ում
12:49 18.04.2017
