ArmNet Awards 2013 մրցույթին կմասնակցեն ավելի քան 400 հայկական կայքեր և բջջային հավելվածներ

ԵՐԵՎԱՆ, 22 նոյեմբերի. /ԱՌԿԱ/. Ավելի քան 400 հայկական կայքեր, բջջային հավելվածներ և սոցիալական ցանցերի էջեր են գրանցված ArmNet Awards 2013 մրցույթին մասնակցելու համար, տեղեկացրեցին մրցույթի կազմակերպիչները։

Գրանցված բոլոր մասնակիցներից ժյուրիի անդամները կընտրեն հաղթողներ ութ անվանակարգերում։

Նոյեմբերի 20–ից մրցույթի շրջանակներում մեկնարկել է ժողովրդական քվեարկության փուլը, որը կտևի մինչև նոյեմբերի 30–ը։ Քվեարկության ընթացքում բոլոր ցանկացողները կարող են քվեարկել իրենց նախընտրած ռեսուրսի օգտին SMS հաղորդագրության միջոցով (1 SMS-ի գինը` 50 դրամ, ներառյալ ԱԱՀ)` բովանդակության մասում նշելով նախընտրած մասնակից կայքի հատուկ կոդը, որը կարելի է գտնել http://www.armnetawards.am/ կայքում` յուրաքանչյուր կայքի հասցեի կողքին:

Քվեարկության արդյունքում ամենաշատ ձայներ հավաքած կայքը կճանաչվի «Ժողովրդական ընտրություն» անվանակարգի հաղթող: Մրցույթի արդյունքները կամփոփվեն նոյեմբերի 30-ին կայանալիք մրցանակաբաշխության ժամանակ:

ArmNet Awards 2013 չորրորդ համահայկական վեբ-մրցույթի մասնակցության հայտերի ընդունումը մեկնարկել էր նոյեմբերի 1–ին։ Նախագծի նպատակն է բացահայտել և պարգևատրել լավագույն նախագծերը, որոնք ստեղծվել են մշակողների հայկական խմբերի կողմից։

ArmNet–ը բաղկացած է լինելու երկու բաղադրիչից` կայքերի մրցույթ և համաժողով` «Այս փոփոխվող բջջային աշխարհը» թեմայով, որի ընթացքում կլինեն տեղեկատվական տեխնոլոգիաների, խաղերի և բջջային հավելվածների ոլորտի ինչպես տեղական, այնպես էլ արտասահմանյան մասնագետների ելույթներ։

ArmNet–ի շրջանակում առաջին անգամ կանցկացվի StartUp Day, որի ընթացքում Սկոլկովոյի Սթարթափ–ակադեմիայի դասախոսներն աշխատանքային սեմինարներ կանցկացնեն սթարթափ–թիմերի և պոտենցիալ ներդրողների հետ, ինչպես նաև կկազմակերպեն «Սթարթափ մենամարտ», որի հաղթողը Սիլիկոնային հովտում (ԱՄՆ) ուսուցման դասընթաց անցնելու հնարավորություն կստանա։

Մրցույթի արդյունքում մրցանակներ կտրվեն լավագույն կայքերին և բջջային հավելվածներին հետևյալ անվանակարգերում` «Դիզայն և հարմարավետություն», «Նորարարություն», «Տեխնիկական կատարում», «Բովանդակություն»,  «Տարվա առաջընթաց», «Հասարակական ազդեցություն», «Գլխավոր մրցանակ» (բոլոր անվանակարգերում ժյուրիի առավելագույն գնահատականին արժանացած կայքը) «Ժողովրդական ընտրություն» Orange-ի կողմից սահմանված մրցանակ` լավագույն մոբայլ կայքի համար։

ArmNet Awards հայկական կայքերի առաջին մրցույթն անցկացվել է 2010 թվականին։ Մրցույթին մասնակցել է մոտ 600 կայք, ևս մոտ 400–ը գրանցման ժամկետի ավարտից հետո են հայտ ներկայացրել և այդ պատճառով չեն ընդգրկվել մրցույթին մասնակցած ռեսուրսների ցուցակում։ ArmNet Awards մրցույթի գրան–պրին շնորհվել է Սերգեյ Փարաջանովի տուն–թանգարանին։

ArmNet միջազգային ամենամյա մրցույթի կազմակերպիչներն են Maeutica բրենդինգային գործակալությունը, Orange Armenia բջջային օպերատորը և «Ինտերնետ Հանրություն» հայկական հասարակական կազմակերպությունը։ Միջոցառման տեղեկատվական հովանավորը telecom.arka.am լրատվական պորտալն է։ –0–

Ծանոթացեք լուրերին առաջինն ու քննարկեք դրանք մեր Telegram-ում

14:18 22.11.2013