Digitec Expo 2014 ցուցահանդեսի շրջանակում Երևանում «Ռոբոտներն առօրյայում» փառատոն կանցկացվի

ԵՐԵՎԱՆ, 17 սեպտեմբերի. /ԱՌԿԱ/. Digitec Expo 2014 10-րդ հոբելյանական տեխնոլոգիական ցուցահանդեսի շրջանակում Երևանում «Ռոբոտներն առօրյայում» փառատոն կանցկացվի, նշված է Հայաստանի ինֆորմացիոն տեխնոլոգիաների ձեռնարկությունների միության (UITE) հաղորդագրության մեջ:

Փառատոնի մասնակիցները ինժեներական խմբակների սաներն են: Այդ խմբակները ձևավորվել են Ինֆորմացիոն տեխնոլոգիաների ձեռնարկությունների միության «ԱրմՌոբոտիկս» ծրագրի շրջանակներում՝ նպատակ ունենալով դպրոցահասակ երեխաների շրջանում զարգացնել տեխնոլոգիական մտածելակերպը և ուղղորդել նրանց հետագա կողմնորոշումը դեպի ՏՏ ոլորտի մասնագիտությունները:

Այս տարի փառատոնի շրջանակում անցկացվելու է նաև էկոռոբոտների մրցույթ, որի նպատակը բնապահպանական քարոզչությունն է և թափոնների վերամշակման կամ այլ նպատակներով օգտագործման վրա հասարակության ուշադրությունը հրավիրելը։

Ծրագրի ղեկավար Աննա Բարոյանի խոսքով՝ տեխնոլոգիաների զարգացումը չպետք է բերի շրջակա միջավայրի աղտոտմանը, այդ պատճառով ուշադրություն ենք հրավիրում բնապահպանական խնդիրներին:

«Ռոբոտներն առօրյայում» փառատոնի այցելու պատանիները հնարավորություն կունենան ծանոթանալ իրենց հասակակիցների հաջողություններին, խոսել տպավորությունների մասին, իսկ նրանց ծնողները կարող են գնահատել ինժեներական խմբակների հնարավորությունները, աշխատանքների կազմակերպման ձևաչափերը և որոշում կայացնել իրենց երեխաների ապագա մասնագիտական կողմնորոշման վերաբերյալ», - ասել է UITE-ի գործադիր տնօրեն Կարեն Վարդանյանը:

Այսօրվա դրությամբ Հայաստանում և Արցախում գործում է 60 ինժեներական խմբակ, որոնց համար պարբերաբար անցկացնում են իրեր տարբերակող, գծին հետևող և այլ ռոբոտների մրցույթներ:

Digitec Expo 2014 10-րդ հոբելյանական ցուցահանդեսը տեղի կունենա Երևանում «Երևան-Էքսպո» ցուցահանդեսային համալիրում, հոկտեմբերի 3-5-ը: Digitec Expo ցուցահանդես-փառատոնը Հայաստանի տեխնոլոգիական ոլորտի ամենագլխավոր և ներկայացուցչական իրադարձությունն է: Այս տարի այցելուներին կներկայացվի  ցուցահանդեսի 13 բաժին: Ակնկալվում է, որ այս տարի ցուցահանդեսին կմասնակցի 150 ընկերություն, որոնցից 120-ը կներկայացնի իր արտադրանքը: Նախնական հաշվարկներով՝ ցուցահանդեսի այցելուների թիվը կկազմի 30 հազարի:

Ցուցահանդեսն անցկացվում է ՀՀ վարչապետի բարձր հովանու ներքո: Ցուցահանդեսի կազմակերպիչն է Հայաստանի ինֆորմացիոն տեխնոլոգիաների ձեռնարկությունների միությունը  (UITE): Միջոցառման գլխավոր հովանավորն է Ucom ընկերությունը: Ցուցահանդեսի ինֆորմացիոն հովանավորն է «ԱՌԿԱ» լրատվական գործակալությունը:

Հայաստանի Ինֆորմացիան տեխնոլոգիաների ձեռնարկությունների միությունը (UITE) հիմնվել է 2000 թվականին տվյալ բնագավառի ընկերությունների տնտեսական շահերը պաշտպանելու, բիզնեսի զարգացումը խթանելու, ՏՏ ոլորտի հետազոտությունները խրախուսելու համար։ Միությունում ներառված են տասնյակ ընկերություններ, որոնք ներկայացնում են Հայաստանի բարձր և տեղեկատվական տեխնոլոգիաների ոլորտը:-0-

Ծանոթացեք լուրերին առաջինն ու քննարկեք դրանք մեր Telegram-ում

13:24 17.09.2014