Facebook–ը սոցցանցի տարբերակ է գործարկել գրասենյակային աշխատողների համար

ԵՐԵՎԱՆ, 15 հունվարի. /ԱՌԿԱ/. Facebook սոցիալական ցանցը թեստային ռեժիմով գրասենյակային աշխատողների համար Facebook at Work անունով սոցիալական ցանց է գործարկել, հաղորդում է Փրայմը` հղում անելով Guardian–ին։

Այժմ աշխատանքային թեստավորում են անցնում լուրերի ժապավենները, խմբերը և հաղորդագրությունների փոխանակման մեխանիզմը։

Պարբերականը նշում է, որ բազմաթիվ ընկերություններ արգելում են իրենց աշխատողներին Facebook–ի օգտվել աշխատանքի ժամանակ, և Facebook at Work–ի մշակումը կատարվել է այնպես, որ այդ ցանցը կարելի լինի օգտագործել նույնիսկ այն գրասենյակներում, որտեղ Facebook մտնելն արգելված է։

Նոր հավելվածն առայժմ գործարկվել է թեստային ռեժիմով «փորձնական գործընկերների» կողմից, ովքեր կարող են աշխատել ինչպես կայքում, այնպես էլ iOS և Android բջջային հարթակներում։

Financial Times–ը նշում է, որ արտաքինից նոր ցանցը շատ նման է ավանդական Facebook–ին, բայց մշակողները խոստանում են, որ կորպորատիվ տվյալներն այստեղ կպահվեն սիրողական լուսանկարներով անձնական էջերից առանձին և այլն։

Ավելի վաղ պարբերականն արդեն հայտնել էր Facebook at Work–ի շուրջ տարվող աշխատանքի մասին։ Նոր սոցցանցի նպատակն է օգնել ընկերությունների աշխատակիցներին գաղափարներ փոխանակելու հարցում` հաղորդագրությունների, գրառումներ կատարելու և խմբերում միավորվելու միջոցով։ Երբ աշխատողը հետաքրքիր գրառում է կատարում, համապատասխան իրազեկումը հայտնվում է լուրերի միանգամից մի քանի ժապավենում և վարակի նման տարածվում է ամբողջ ընկերությունում։

Ցանցի մասնակիցները կարող են միմյանց «ընկեր» դառնալ կամ պարզապես ուրիշների հաղորդագրությունների բաժանորդ դառնալ։ Օրինակ` շարքային աշխատողը կարող է ընթերցել ղեկավարի ժապավենը` չլինելով նրա ընկերների ցուցակում։

Ենթադրվում է, որ նոր սոցցանցի միջոցով Facebook–ը կկարողանա մրցել գրասենյակային փաթեթների և Google–ի, Microsoft–ի և LinkedIn–ի ցանցային կորպորատիվ համակարգերի հետ։ Սակայն առայժմ մշակողների հիմնական ուշադրությունը զբաղեցնում են  ներկորպորատիվ շփման միջոցները։ -0-

Ծանոթացեք լուրերին առաջինն ու քննարկեք դրանք մեր Telegram-ում

16:55 15.01.2015