Էլեկտրոնային կառավարման համակարգ կներդրվի Հայաստանի ՔԿԱԳ–ներում
ԵՐԵՎԱՆ, 3 ապրիլի. /ԱՌԿԱ/. ՀՀ կառավարությունն իր այսօրվա նիստում հավանություն է տվել «Քաղաքացիական կացության ակտերի մասին» օրենքում լրացումներ կատարելու օրենքի նախագծին, որին համապատասխան` մինչև 2014 թվականի մայիս–հունիսը հանրապետության ամբողջ տարածքի ՔԿԱԳ–ներում կգործի էլեկտրոնային կառավարման համակարգ։
Ինչպես պարզաբանեց արդարադատության նախարար Հրայր Թովմասյանը, ներկայում գործում է ՔԿԱԳ թղթային համակարգ, կիրառվում թղթային գրանցամատյան, փաստաթղթերը և դիմումները պատրաստվում են ձեռագիր:
«Եվրամիության աջակցությամբ մշակվել և փորձարկվել է ծրագրային ապահովում և էլեկտրոնային գրանցման նոր համակարգ, որն արդեն գործում է Երևան քաղաքի ՔԿԱԳ մարմիններում և Գյումրիում: Նշված համակարգը ՀՀ ամբողջ տարածքում նախատեսվում է ավարտել 2014թ. մայիս-հունիսին»,– ասաց նախարարը։
Հայաստանի վարչապետ Տիգրան Սարգսյանն իր հերթին նշեց, որ այս համակարգի ներդրման արդյունքում ծառայությունները կլինեն ավելի որակյալ։ -0-
Ծանոթացեք լուրերին առաջինն ու քննարկեք դրանք մեր Telegram-ում
17:00 03.04.2014