LG–ն Ռուսաստանում ներկայացրել է webOS–ով առաջին «խելացի» հեռուստացույցները

ԵՐԵՎԱՆ, 14 մարտի. /ԱՌԿԱ/. LG ընկերությունը Ռուսաստանում ներկայացրել է 2014 թվականի «խելացի» հեռուստացույցների մոդելների շարք, որոնք աշխատում են  webOS օպերացիոն համակարգով, գրում է digit.ru–ն` հղում անելով LG ընկերության հաղորդագրությանը։

LG–ի հաղորդմամբ, webOS բաց պլատֆորմը կդյուրացնի համակարգերի համար հավելվածների մշակումը և թույլ կտա հեռուստացույցների բազայի վրա տնային մուլտիմեդիոն համակարգ ստեղծել։

2014 թվականի ներկայացված մոդելների շարքն ամենամեծն է ընկերության պատմության մեջ և ունի 68 մոդել` ներառյալ 3840×2160 կետայնության թողունակությամբ (Ultra HD) և 49-ից մինչև 105 դյույմ անկյունագծերով հեռուստացույցներ։ webOS օպերացիոն համակարգը, որն LG–ն գնել է HP–ից 2013 թվականին, օգտագործվում է Smart TV հնարավորությամբ մոդելներում։ Համակարգն ի սկզբանե մշակվում էր սմարթֆոնների օգտագործման համար, բայց HP–ն դրանց միայն մի քանի մոդել է ներկայացրել, որոնք շուկայում պահանջարկ չեն ունեցել։

LG 2014 հեռուստացույցների ձայնային համակարգերը մշակվել են Harman Kardon ընկերության հետ համագործակցությամբ։ LG ընկերությունը հայտարարել է նաև, որ ակտիվ աշխատում է 4K թողունակության տեսակոնտենտի մատակարարների հետ, ներառյալ Fox և Netflix ընկերությունները, ինչպես նաև տեղային մալուխային և արբանյակային օպերատորների հետ։

Ինչպես հայտնում էր Digit.ru–ն, հեռուստացույցների արտադրությամբ զբաղվող LG Home Entertainment ստորաբաժանման հասույթը 2013 թվականին կազմել է մոտ 19.95 միլիարդ դոլար` 2012 թվականի մակարդակի համեմատ կրճատվելով 5 տոկոսով, չնայած Հյուսիսային Ամերիկայի, Ասիայի և ԱՊՀ երկրների պահանջարկի ավելացմանը։ -0-

Ծանոթացեք լուրերին առաջինն ու քննարկեք դրանք մեր Telegram-ում

19:40 14.03.2014