Nokia–ն կներկայացնի իր վերջին սմարթֆոնները, ֆաբլետը և պլանշետը
ԵՐԵՎԱՆ, 22 հոկտեմբերի. /ԱՌԿԱ/. Nokia World համաժողովում, որը կկայանա այսօր` հոկտեմբերի 22–ին, Nokia ընկերությունն ամենայն հավանականությամբ կներկայացնի իր վերջին սմարթֆոնը, որը պետք է Windows Phone օպերացիոն համակարգով աշխատող ամենահզոր սարքը լինի, և Lumia և Asha շարքի մի քանի բյուջետային մոդելներ, հաղորդում է Digit.ru–ն։
Միջոցառումը կդառնա ամենախոշոր իրադարձությունը Windows Phone օպերացիոն համակարգով բջջային տեխնիկայի շուկայում` Nokia ընկերությունն այժմ Microsoft–ի այդ պլատֆորմով սմարթֆոնների հիմնական արտադրողն է և, AdDuplex վերլուծական ընկերության վարկածով, զբաղեցնում է շուկայի 90 տոկոսը, ինչպես հաղորդում է Digit.ru–ն։ Հավանաբար, սա կլինի ֆիննական ընկերության վերջին համաժողովը, որում աշխարհը Nokia–ի նոր հեռախոսներ կտեսնի։ Սեպտեմբերի սկզբին ընկերության`բջջային տեխնիկայի մշակմամբ զբաղվող ստորաբաժանումը ձեռք էր բերվել Microsoft ընկերության կողմից, որը, այդպիսով, 2014 թվականի առանձին եռամսյակից փաստորեն կստանձնի Windows Phone սեփական օպերացիոն համակարգի տարածման գլխավոր դերը։
Nokia World–ում ներկայացվող սարքերն ավելի կարևոր կլինեն Microsoft–ի, քան հենց Nokia–ի համար, որի բաժնետոմսերը կանոնավոր աճում են բջջային ստորաբաժանման վաճառքի մասին հայտարարությունից հետո։ Հոկտեմբերի 22–ին ներկայացված տեխնիկան Surface շարքի պլանշետների հետ միասին կդառնա արտադրանքների պորտֆոլիոյի հիմքը, որով Microsoft–ն արդեն հաջորդ տարի կմտնի շուկա որպես բջջային տեխնիկայի խոշոր արտադրող։
Nokia–ի ներկայացուցիչները պաշտոնապես չեն մեկնաբանել, թե ինչ սարքեր կարող է հանրությանը ներկայացնել Սթիվեն Էլոպը, ով վերջերս լքել է ընկերության գլխավոր տնօրենի պաշտոնը և ներկայում գլխավորում է հեռախոսային ստորաբաժանումը։ ԶԼՄ–ների տեղեկացմամբ, Nokia–ն կներկայացնի ամենատարբեր ֆորմ–ֆակտորների վեց նոր սարքեր։
Շնորհանդեսի գլխավոր հիթ կդառնա Nokia Lumia 1520 6–դյույմանոց ֆաբլետը, որն արդեն մի քանի անգամ հիշատակվել է մամուլում և ժամանակից վաղ հրապարակված մարքեթինգային նյութերում։ Սմաթֆոնն առաջինը WP-սարքերից կստանա չորսմիջուկանի Qualcomm Snapdragon 800 պրոցեսոր, և կունենա 2 Գբայթ օպերատիվ հիշողություն։ -0
Ծանոթացեք լուրերին առաջինն ու քննարկեք դրանք մեր Telegram-ում
11:24 22.10.2013