Հայկական Sphere սթարթափի նոր հավելվածը կօգնի գտնել քաղաքի ամենահետաքրքիր վայրերը
ԵՐԵՎԱՆ, 11 մայիսի. /ԱՌԿԱ/. Հայկական Sphere սթարթափի նոր հավելվածը կօգնի գտնել քաղաքի ամենահետաքրքիր վայրերը։ Նոր հավելվածի մասին «ԱՌԿԱ» գործակալությանը մանրամասն պատմել է գաղափարի հեղինակ, Sphere–ի գլխավոր տնօրեն Դավիթ Խաչատրյանը։
Sphere–ի ստեղծման պատմությունը և արդիականությունը
Հավելվածը ստեղծելու որոշումն ընդունվել է 2015 թվականի սկզբին, երբ մշակողներից մեկը փորձեց գտնել հայկական մայրաքաղաքի կենտրոնում ամենահետաքրքիր վայրերը։ Ընկերների առցանց խորհուրդները նրան մղեցին հատուկ հավելված ստեղծելու գաղափարին, որն օնլայն ռեժիմով թույլ է կտար ցանկացած հետաքրքրող թեմայով հարցում ուղարկել, որին կարող են պատասխանել հավելվածի բոլոր օգտագործողները։
Օրինակ` քաղաքներից մեկում տեսարժան վայրերի կամ ռեստորանների մասին հարցմանը կարող են պատասխանել նաև այլ երկրների օգտագործողներ, որոնք եղել են այդտեղ, և տալ իրենց խորհուրդները։
Հավելվածն ակտիվ է փետրվարից, այս պահին մշակողները նշում են դրա բարձր ակտիվությունը։ Զուգահեռ կատարվում են Sphere որակի բարելավման աշխատանքներ։
Խաչատրյանի խոսքով` այժմ հավելվածը հասանելի է Android–ի համար, շուտով այն կլինի նաև Apple–ում։ Sphere-ն արդեն հասցրել են բեռնել մոտ 2000 օգտագործողներ, և նրանցից մոտ 600–ն ակտիվ են շաբաթվա ընթացքում։
Ինչպե՞ս է աշխատում հավելվածը
Sphere–ը հնարավորություն է տալիս մարդկանց իրենց գտնվելու ցանկացած կետում իրական ժամանակի ռեժիմում շփվել հավելվածի օգտագործողների հետ ակնթարթային հաղորդագրությունների միջոցով։
«Դուք օնլայն ռեժիմով արագ տեղեկություն եք ստանում։ Օրինակ` եթե դուք պատրաստվում եք ընկերուհու հետ այցելել ինչ–որ ժամանցային կենտրոն, բայց չեք կողմնորոշվում ընտրության հարցում, հավելվածի միջոցով դուք օնլայն ռեժիմում օգտագործողներից պետքական խորհուրդներ կարող եք ստանալ, որոնք կօգնեն ձեզ գտնել այն, ինչ փնտրում եք»,– նշեց Խաչատրյանը։
Հավելվածի օգտագործողները կարող են ցանկացած տեղեկություն հաղորդել միմյանց։ Օրինակ` կարող է օգնություն կարիք լինել ուղևորության, ընկերության գրանցման, քաղաքային իշխանություններին ուղղված հայտի լրացման հարցում, խորհրդի կարիք լինել այս կամ այն օբյեկտին մոտենալու վերաբերյալ։
«Հավելվածի էությունն այն է, որ այն մտերմացնում է մարդկանց ցանցում անմիջական և ոչ պաշտոնական շփման միջոցով, միաժամանակ մարդիկ պարտադիր չէ, որ ծանոթ լինեն։ Ձեր գրած հարցը միանգամից հասնում է ցանկացած օգտագործողի, և դուք ստիպված չեք լինի սպասել պատասխանի կամ փնտրել որոնողականներում»,– ասաց Խաչատրյանը։
Նա ավելացրեց, որ օգտագործողն ընտրում է հարցի թեման և ուղարկում նրանց, ովքեր դրանով հետաքրքրվում են։ «Ես հասկացա, որ նման հավելվածը կօգնի մարդկանց առավել հավաստի տեղեկություն ստանալ` ի տարբերություն ինչ–որ կասկածելի գովազդի»,– ասաց Խաչատրյանը։
Նա ավելացրեց նաև, որ հավելվածում գրանցումը պարտադիր չէ, կարելի է ընդամենը գրանցվել Facebook սոցցանցի միջոցով։ -0-
Ծանոթացեք լուրերին առաջինն ու քննարկեք դրանք մեր Telegram-ում
17:51 11.05.2015
