ԵՐԵՎԱՆ, 10 ապրիլի. /ԱՌԿԱ/. Mail.Ru Group ընկերությանը պատկանող «Օդնոկլասնիկի» խոշորագույն ռուսական սոցիալական ցանցերից մեկի խափանման պատճառը վնասված կոնֆիգուրացիոն ֆայլն էր, որից կախված էր ծառայության աշխատանքը, հաղորդում է Digit.ru–ն` վկայակոչելով «Օդնոկլասնիկիի» մամուլի քարտուղար Մարիա Լապուկին։

«Օդնոկլասնիկի» կայքն անհասանելի էր օգտագործողների համար ուրբաթ գիշերը` սոցցանցի գլխավոր էջը մտնելիս օգտագործողները հաղորդագրություն էին տեսնում տեխնիկական աշխատանքների վերաբերյալ։ Խափանումից հետո սոցիալական ցանցի աշխատանքի վերականգնումը տևեց ավելի քան երկու օր, չնայած կայքի մասնակի աշխատանքը վերականգնվեց դեռ ուրբաթ։

«Վնասված ֆայլը տեղադրվել էր ծառայությունների կառավարման կենտրոնացված համակարգի միջոցով։ Դրա հետևանքով մեր ծառայությունների մեծ մասի վերագործարկման և օպերացիոն համակարգի վերատեղադրման անհրաժեշտություն առաջացավ»,– հայտնել է Լապուկը։ Ինչպես հաստատում են սոցիալական ցանցի ներկայացուցիչները, սոցցանցի ենթակառուցվածքը հիմնվում է 5 հազար ծառայությունների վրա` Linux օպերացիոն համակարգի բազայով։

Ըստ նրա` ներկա պահին ընկերությունը սխալի պատճառների մանրամասն վերլուծություն կանցկացնի և կլուծի կադրային վերադասավորումների անհրաժեշտության վերաբերյալ հարցը։ Բացի այդ, սոցցանցի աշխատակազմը  մտադիր է երկարաձգել բոլոր գնված վճարովի ծառայությունները և օգտատերերին լրացուցիչ բոնուսներ տրամադրել։

«Օդնոկլասնիկի» սոցիալական ցանցն ինտերնետի ռուսական հատվածի խոշորագույն ցանցերից է, դրա օրական լսարանը կազմում է մոտ 40 միլիոն։ «Օդնոկլասնիկի»-ի գլխավոր մրցակիցը Ռուսաստանում «ՎԿոնտակտե» սոցիալական ցանցն է։ -0-

Ծանոթացեք լուրերին առաջինն ու քննարկեք դրանք մեր Telegram-ում

12:13 10.04.2013