Ինտերնետի կարգավորման հարցերի ազգային առաջին ֆորումը կանցկացվի 2013թ.–ին Հայաստանում

ԵՐԵՎԱՆ, 21 մարտի. /ԱՌԿԱ/. Ինտերնետի կարգավորման հարցերի ազգային առաջին ֆորումը կանցկացվի 2013թ.–ին Հայաստանում, «ԱՌԿԱ» գործակալությանը հայտնեց ICANN (Անվանումների և համարների ինտերնետ կորպորացիա) կազմակերպության անդամ Սիրանույշ Վարդանյանը։

«Ամեն տարի տարբեր երկրներում անցկացվում է Ինտերնետի կարգավորման հարցերի միջազգային ֆորումը։ Այս տարի ՀՀ տրանսպորտի և կապի նախարարությունը մտադիր է առաջին անգամ նման ֆորում կազմակերպել ազգային մասշտաբով»,– ասաց նա։

Միաժամանակ Վարդանյանը ենթադրեց, որ ֆորումին, որի անցկացման ժամկետները դեռ ճշտվում են, ներկա կգտնվեն նաև միջազգային ՏՏ ոլորտի ականավոր ներկայացուցիչներ։

Նա տեղեկացրեց նաև, որ անցյալ տարվա միջազգային ֆորումն անցել է Ադրբեջանում, և Հայաստանի ներկայացուցիչներն առցանց ռեժիմով հետևել են դրա աշխատանքին և բոլոր քննարկումներին։

Ինտերնետի կարգավորման հարցերի ֆորումը (Internet Governance Forum), որը կազմակերպվել է Միացյալ Ազգերի Կազմակերպության հովանու ներքո, առաջին անգամ տեղի է ունեցել 2005թ.–ին` ՄԱԿ–ի հատուկ մանդատի շրջանակներում։ Այդ մանդատը տրվել է հինգ տարով և 2010թ.–ին երկարաձգվել է ևս հինգ տարով։ –0–

Ծանոթացեք լուրերին առաջինն ու քննարկեք դրանք մեր Telegram-ում

17:16 21.03.2013