Տեղեկատվական անվտանգության համաշխարհային շուկան 2012թ.–ին աճել է 7,9%–ով

ԵՐԵՎԱՆ, 30 մայիսի. /ԱՌԿԱ/. Տեղեկատվական անվտանգության համաշխարհային շուկան 2012թ.–ին, 2011թ.–ի համեմատ,  աճել է 7,9 տոկոսով` հասնելով 19,135 մլրդ դոլարի, գրում է digit.ru –ն` հղում անելով Gartner վերլուծական գործակալության հաղորդագրությանը։

Շուկայում առաջատարի դիրքերը (մասնաբաժինը` 19,6%) պահպանել է Symantec ընկերությունը, որը ստացել է 3,747 մլրդ դոլարի չափով եկամուտ։ McAfee–ն զբաղեցրել է երկրորդ տեղը` 8,8 տոկոս մասնաբաժնով և 1,680 մլրդ դոլարի չափով եկամտով, ընդ որում եկամուտն աճել է 37 տոկոսով։ Trend Micro–ն 6,1 տոկոս մասնաբաժնով և 1,172 մլրդ դոլարի չափով եկամտով հայտնվել է երրորդ տեղում։ Չորրորդ տեղում է գտնվում IBM–ն (5% մասնաբաժնով 953,6 մլն դոլար), հինգերորդ տեղում է EMC–ն (եկամուտը` 717,6 մլն դոլար, մասնաբաժինը`3,7%)։

Գործակալությունը նշում է տարածաշրջանների շուկայի աճի անհավասարությունը։ Նվազագույն աճ է ցուցադրել Արևմտյան Եվրոպան, ինչն ըստ գործակալության` կապված է տնտեսության անորոշության և եվրոյի ու դոլարի փոխարժեքային տատանումների հետ։

Ըստ գործակալության`շուկայի հետագա զարգացման խթան պետք է դառնա աշխատակիցների կողմից սեփական սարքերի օգտագործման պրակտիկայի ընդլայնումը  (BYOD), ինչպես նաև վիրտուալիզացիայի հետագա տարածումը, ինչը վիրտուալ միջավայրերում պաշտպանության լուծման պահանջարկ կառաջացնի։ –0–

Ծանոթացեք լուրերին առաջինն ու քննարկեք դրանք մեր Telegram-ում

19:42 30.05.2013