1991 թվականի այս օրն է ստեղծվել աշխարհում առաջին կայքը
ԵՐԵՎԱՆ, 6 օգոստոսի. /ԱՌԿԱ/. Բրիտանացի գիտնական Թիմ Բերներս Լին 1991 թվականի այս օրը ստեղծեց աշխարհում առաջին info.cern.ch կայքը։ Աշխարհում առաջին ինտերնետային էջում Բերներս Լին հրապարակեց World Wide Web նոր տեխնոլոգիայի բնութագիրը։
Գիտնականը աշխատում էր CERN (Ժնևում գտնվող Ատոմային հետազոտությունների եվրոպական կենտրոնում), որը Եվրոպայի ամենամեծ ինտերնետ–հանգույցն էր։ 1990 թվականին համացանցն արդեն գործում էր որպես համակարգչային ցանցերի միացյալ գլոբալ համակարգ։ ԱՄՆ–ում, Կանադայում և Եվրոպայում համացանցից օգտվողների թիվը ավելի քան 300 հազար էր կազմում։
Համաշխարհային սարդոստայնին «World Wide Web» անվանումը տալու գաղափարը պատկանում է Թիմ Բերներս Լիին։
1991 թվականին թերևս որևէ մեկը չէր կարող ենթադրել անգամ, որ 2014 թվականի մայիսին աշխարհում 975,3 միլիոն կայք կլիներ:-0-
Ծանոթացեք լուրերին առաջինն ու քննարկեք դրանք մեր Telegram-ում
12:42 06.08.2014