2012 թվականի դեկտեմբերի 28-ին մեկնարկել է Hayland.am սոցիալական ցանցի ամանորյա նախագիծը՝ «Համահայկական վիրտուալ տոնածառը»

ԵՐԵՎԱՆ, 28 դեկտեմբերի. /ԱՌԿԱ/. 2012 թվականի դեկտեմբերի 28-ին մեկնարկել է  Hayland.am  սոցիալական ցանցի ամանորյա նախագիծը՝  «Համահայկական վիրտուալ տոնածառը», «ԱՌԿԱ» գործակալությանը հաղորդեցին սոցիալական ցանցից:

««Համահայկական  վիրտուալ տոնածառ» նախագիծը հնարավորություն է ստեղծում ստանալ և մատուցել հաճելի ամանորյա նվերներ, դառնալ ցանկություններ իրականացնող «Անակնկալ Ձմեռ պապ»  և գտնել նոր ընկերներ»,– ասվում է հաղորդագրության մեջ։

Նախագծի նպատակն է ստեղծել ամանորյա բարեմաղթանքների և ցանկությունների  համահայկական առցանց հարթակ՝ հնարավորություն ընձեռելով աշխարհի տարբեր երկրներում ապրող հայերին շնորհավորել իրար ու կատարել միմյանց ցանկությունները:

Hayland.am -ի գլխավոր էջում տեղադրված վիրտուալ տոնածառի  բոլոր այցելուները՝ անկախ նրանից հանդիսանում են Hayland.am –ի սոցիալական ցանցի օգտատեր, թե ոչ, կարող են թողնել իրենց մաղթանքները և ցանկությունները։

Իրենց մաղթանքները թողնելով` օգտատերերը կարող են նաև  ընտրել որևէ ցանկություն և կատարել այն՝ անակնկալ մատուցելով դրա հեղինակին, դառնալով ցանկություններ իրականացնող և նվերներ մատուցող «Անակնկալ Ձմեռ պապ»:

«Ամանորը հրաշքների ու երազանքների իրականացման ժամանակաշրջան է: Կատարենք հեռու ու մոտիկ ապրող մեր ազգակիցների երազանքները: Գտեք Ձեր կարծիքով ամենայուրահատուկ ցանկությունը, որը կարող եք և ուզում եք իրագործել , մինչև հունվարի 13-ը կապվեք դրա հեղինակի հետ, մատուցեք կամ ուղարկեք նրա ցանկացած նվերը։ Լուսանկարվեք Ձեր «Անակնկալ Ձմեռ պապի» կամ նոր ընկերոջ հետ կամ լուսանկարեք Ձեր ստացած նվերը և  մինչև հունվարի 13-ը  ուղարկեք  [email protected] էլեկտրոնային հասցեին»,– նշեցին սոցիալական ցանցից։

Նախագծի ամփոփումից հետո Ձեր լուսանկարը կհայտնվի վիրտուալ տոնածառի վրա։ –0–

Ծանոթացեք լուրերին առաջինն ու քննարկեք դրանք մեր Telegram-ում

20:08 28.12.2012